Ўзбекистонда жорий йил пахта мавсумида қўлда терилган бир килограмм пахта хомашёси учун 650 сўм ҳақ тўланади. Бу ҳақда 5 сентябрь куни Ўзбекистон Бош вазири раислигида ўтказилган йиғилишда маълум қилинди, деб хабар беради daryo.uz.

 Пахта хомашёси машинада терилганда бир тонна учун 400 минг сўм, қўлда терилган бир килограмм учун биринчи босқичда контрактация шартномаси 60 фоизгача бажарилгунга қадар 650 сўм, иккинчи босқичда — 60 фоиздан 80 фоизгача 850 сўм, учинчи босқичда — 80 фоиздан ортганда 1000 сўмдан иш ҳақи тўлаш белгиланди.

Аҳоли кам бўлган ҳудудлар учун алоҳида тартиб белгиланиб, Жиззах, Сирдарё, Тошкент вилоятларининг барча туманларида, шунингдек, Қашқадарё вилоятининг Косон, Муборак, Нишон ва Касби, Сурхондарё вилоятининг Қизириқ ва Музработ туманларида Молия вазирлиги ҳузуридаги қишлоқ хўжалигини давлат томонидан қўллаб-қувватлаш жамғармаси томонидан қўлда терилган бир килограмм пахта учун қўшимча 150 сўм, озиқ-овқат харажатларига 150 сўм, жами 300 сўм устама ҳақи тўланадиган бўлди.