8 декабрдан бошлаб Тошкентда марказий иситиш тизими ва иссиқ сув таъминоти тарифлари кўтарилади. Бу ҳақда «Тош­иссиққуввати» ДУК хабар берди. Таъкидланишича, нархлар «энергия ташувчилар ва материаллар нархи ошиши» муносабати билан кўтарилади.

Аҳоли учун марказий иситиш тизимига бир ойлик тариф турар-жой квадрат метри учун — 1610,99 сўмгача (ҳозирги нарх: 1464,53 сўм) оширилади;

Иссиқ сув таъминоти учун янги тариф ҳисоблагичсиз киши бошига 18 609,24 сўмни ташкил этади;

ҳисоблагич ускунаси бўлганда иссиқ сув таъминоти кубометрига 4765,20 сўм (амалдаги нарх: 4332сўм)га тенг бўлади;

Умумий ювиниш хонаси бўлган ётоқхоналарда яшовчилар учун иссиқ сув нархи киши бошига бир ойда 13 843,47 сўмни ташкил этади.

Иссиқ сув ҳисоблагич қурилмалари бўлмаган аҳолига етказиб бериладиган иссиқ сув учун ҳақ иссиқ сув таъминоти хизматларига ўрнатилган тарифларга 1,5 баробарлик ошиб борувчи коэффициентни қўллаган ҳолда амалга оширилади.

Олдинроқ интернет сайтлар орқали 16 ноябрдан иссиқ сув ва иссиқлик таъминоти нархлари  оширилгани тўғрисида хабарлар тарқатилган эди. «Тошиссиққуввати» ДУКдан маълум қилишларича, бу хабарлар нотўғри, 16 ноябрдан нархлар ошмаган.