Илгари давлат харидлари тизимида мижозларнинг иштирок этиши жараёнида, буюртмачи ва етказиб берувчи ўртасида кўплаб муаммолар учраб турар эди. Бунда соғлом рақобат муҳити сустлиги боис харидорларнинг давлат харидларига бўлган талаб ва мурожаатлари кам эди. Эндиликда мана шу тизим ўзгармоқда.

Давлат харидларига бўлган талабни ошириш ва соҳада соғлом рақобат муҳитини шакллантириш, юзага келаётган бир қанча муаммоларни бартараф этиш мақсадида Республика товар хомашё биржаси                 www.xarid.uz порталини ишга туширди. Ҳозирги пайтда электрон тизимда 60 мингдан зиёд буюртмачилар ва етказиб берувчилар рўйхатдан ўтган. Уларнинг аксарият қисми кичик бизнес субъектлари ва хусусий тадбиркорлар ҳисобланади.
— Янги тизим ишга тушгандан буён умумий қиймати 2,5 триллион сўмлик битимлар тузилди, — дейди «ЎзРТХБ» АЖ Савдоларни ташкил этиш бўйича директори Жаҳонгир МУТАЛИБОВ. — Бюджет ва корпоратив буюртмачилар маблағларини тежаш ҳажми эса 422,8 миллард сўмни ташкил қилди. Давлат харидлари бўйича 2018 йилда тузилган битимларнинг ижро этиш даражаси эса 95 фоизга етди. 2019 йил I чорак якунига кўра www.xarid.uz порталида умумий қиймати 578,1 миллард сўмга тенг 122 мингдан зиёд шартнома тузилди. Хусусан, бюджет буюртмачилар 201,4 миллард сўмга тенг 73 мингта битим, корпоратив буюртмачилар эса қиймати 376,7 миллард сўмга тенг 49 мингта битим имзоладилар. Яъни, электрон дўконда 175,2 миллиард сўмлик, электрон аукционда эса 402,9 миллиард сўмлик шартномалар имзоланган. Мазкур битимлар орасида хусусий тадбиркорлик улуши 95 фоиздан ортиқни ташкил қилади.
Яратилаётган қулайликлар туфайли ўтган давр мобайнида бюджет ва корпоратив буюртмачиларнинг 102,8 миллиард сўмлик маблағи иқтисод қилинди.
Бекзод  Насимбоев