Қирғизистон Тожикистон билан чегарадаги назорат ўтиш постларидан бирини ёпмоқчи. Бу ҳақда мамлакат бош вазир ўринбосари Акрам Мадумаров парламентнинг 12 май кунги мажлисида маълум қилган.

Депутат Таабалди Тиллаев чегара масалалари ҳал бўлмагунга қадар Тожикистон билан чегаралар беркитилишини таклиф қилди, унинг таъкидлашича можаролар туфайли маҳаллий аҳоли ва чегарачилар зиён кўрмоқда.
Гап шундаки, 8 май куни Қирғизстон-Тожикистон чегарасида 4 гектар ердан фойдаланиш оқибатида можаро келиб чиқди. Тожикистон ўз харитасига асосланиб бу ҳудудни ўзиники дейди ва шу сабабли қишлоқ аҳолиси қирғизистонликларни ҳайдаб чиқарган. Тўқнашув вақтида уч нафар қирғизистонлик чегарачи ўқ отар қуролдан жароҳатланди, улардан бирининг аҳволи оғир экани айтилмоқда.
Тожикистон томони можаро учун масъ­улиятни қирғиз чегарачиларининг зиммасига юклаган ҳамда қўшни мамлакат ҳарбий хизматчилари ўртасидаги қарама-қаршилик туфайли Тожикистоннинг икки фуқароси оғир жароҳат олгани ҳақида баёнот берган. Бунинг натижасида Қирғизистон ва Тожикистон 8 май кунги чегара можароси туфайли ўзаро норозилик нота алмашди.
Қирғизистоннинг Боткен ва Тожикистоннинг Сўғд вилояти раҳбарлари икки томонлама учрашув ўтказди ҳамда масалани муҳокама қилдилар. Музокоралар вақтида можара ҳудудида келажакда низо келиб чиқмаслиги учун аҳоли ўртасида тушунтириш ишлари олиб борилиши, шунингдек, икки томонлама ҳамкорликни фаоллаштириш масалалари муҳокама қилинди.