Бишкекда 23 июнь куни жиноий авторитет Азиз Батукаевнинг ноқонуний озод этилиши билан боғлиқ суд жараёни якунланди. Суд мамлакат собиқ президенти Алмазбек Атамбаевни мол-мулки мусодара қилиниши билан 11 йилу 2 ой муддатга озодликдан маҳрум қилди.
 

Суд ёпиқ режимда бўлиб ўтди. Аввалроқ прокурорлар судьялардан Атамбаевни 15 йил озодликдан маҳрум этишни сўрагани айтилган эди. Бундан ташқари, Атамбаев давлат унвон ва мукофотлари – «Данакер», II даражали «Манас» орденлари, «Данк» медали ва бошқа қимматбаҳо буюмларидан маҳрум қилинди.
А.Атамбаев ва унинг яқин қариндошларига тегишли бешта транспорт воситаси, Чуй ва Иссиқкўл вилоятларидаги уйлар, ер участкалари – жами 10 та объект ҳам мусодара қилинадиган мол-мулклар рўйхатига тушган.Жиноят оламида машҳур бўлган қирғизистонлик Азиз Батукаев 2006 йилда 16 йил 8 ой муддатга озодликдан маҳрум қилинган. Аммо 2013 йилда  шифокорларнинг «бедаво дардга чалингани» борасидаги хулосасига кўра, у муддатдан аввал озод қилинди. Собиқ давлат раҳбари ушбу жиноятчини ноқонуний равишда қамоқдан озод қилиш иши бўйича коррупцияда айбдор деб топилди.