Шу кунларда Қорақалпоғистонга ташриф буюрган меҳмонлар камёб манзарани кузатишлари мумкин – Мўйноқдаги Судочье кўлига қизғиш фламинголар галаси қайтиб келди.

Сўнгги йилларда бу қушлар сони мунтазам кўпайиб бормоқда ва бу ҳудудда улар учун қулай яшаш муҳити яратилаётганидан дарак беради.

Кўл жониворлар учун егуликларга бой, иссиқ ўлкаларга учаётган фламинголар бу жойда узоқ вақт тўхтаб ўтадилар, инлар қурадилар.

Фламинголар кўлда тўхташ муддати тахминан икки ойни ташкил қилади. Улар яшаётган ҳудудга етиб бориш учун йўлтанламас автомобиллар зарур. Ҳозирги кунда ушбу ҳудуддаги қушларни асраш, уларни томоша қилиш учун ташриф буюрган сайёҳларга қулай шароит яратиш бўйича барча чоралар кўрилмоқда.

Оролбўйидаги экологик вазиятнинг ўнгланаётгани, ҳудуднинг экотизими яна барқарорлик сари юз тута бошлагани қилинаётган ишлар беиз кетмаганини кўрсатиб турибди.