Мадридда бўлиб ўтган БМТ Жаҳон туризм ташкилотининг сессиясида 2023 йилги Бош ассамблеяни ўтказиш учун Ўзбекистон танлаб олинди. Шу муносабат билан 2023 йилда Самарқандга жаҳон туризм пойтахти мақоми берилади. Бош ассамблеяни ўтказишга Португалия ҳам даъвогарлик қилган эди.

Бирлашган миллатлар ташкилотининг Жаҳон туризм ташкилоти (UNWTO) Бош ассамблеяси 2023 йилда Самарқанд шаҳрида ўтказилади. Шу муносабат билан кўҳна шаҳар 2023 йили жаҳон туризм пойтахти бўлади.

Бу Испаниянинг Мадрид шаҳрида бўлиб ўтаётган UNWTOнинг 24 сессиясида маълум қилинди, деб хабар берди Туризм ва спорт вазирлиги матбуот хизмати «Газета.uz»га.

Ушбу нуфузли тадбирни ўтказиш мақсадида Самарқанддаги эшкак эшиш канали қирғоғидаги 212 гектар майдонда Samarkand Touristic Centre бунёд этилмоқда. У ерда New Renaissance конгресс-холли, меҳмонхоналар, ресторанлар, дам олиш масканлари, савдо марказлари, амфи­театр, «Мангу шаҳар» каби иншоотлар ҳам қурилади. Ушбу объектларни 2022 йилнинг биринчи чорагида ишга тушириш режалаштирилган.

Қайд этилишича, ҳозирга қадар БМТ оиласига кирувчи ташкилотлар Бош ассамблеяси Ўзбекистонда ўтказилмаган.