Гулшан Дадабоева — қўли гул тикувчилардан. Ўтган йили касб-ҳунар коллежини тамомлаган бу қиз тадбиркор сифатида ўз фаолиятини самарали юритиб келмоқда.

Миллий ва замонавий услубдаги либослар тикиш билан шуғулланадиган ҳунарманд қиз «устоз-шогирд» анъанаси асосида тенгдошларига  ўз ҳунари сирларини ўргатишни ҳам йўлга қўйган. Икки нафар касб-ҳунар коллежини тамомлаган дугонасини иш билан таъминлаган.

Ҳа, айни пайтда юртимизнинг исталган ҳудудида Гулшан каби бундай ютуқларга эришаётган навқирон авлод вакилларини кўплаб учратиш мумкин. Бунинг сабаблари кўп, албатта. Аввало, мамлакатимизда ёш тадбиркорлар сафини кенгайтириш, уларнинг самарали фаолият юритиши учун зарур имтиёз ва қулайликлар яратишга катта эътибор қаратилаётгани бунда муҳим омил бўлмоқда.

Ёшларнинг истиқболли ғоя ва ташаббусларини қўллаб-қувватлаш ва рағбатлантириш, аввало, касб-ҳунар коллежи битирувчиларини тадбиркорликка жалб этиш ҳамда улар учун янги иш ўринларини яратиш бугунги кунда муҳим вазифалардан биридир. Хусусан, Президентимизнинг 2015 йил 15 майда қабул қилинган «Хусусий мулк, кичик бизнес ва хусусий тадбиркорликни ишончли ҳимоя қилишни таъминлаш, уларни жадал ривожлантириш йўлидаги тўсиқларни бартараф этиш чора-тадбирлари тўғрисида»ги фармони бу борадаги ишларни янада жадаллаштиришда муҳим дастуриламал бўлиб хизмат қилмоқда. Мазкур ҳужжатга асосан, 2015 йил 1 июлидан якка тартибдаги тадбиркорларга, фаолиятидан келиб чиққан ҳолда, бир нафардан уч нафаргача ишчи ёллаш ҳуқуқи берилди. Ҳар бир ёлланган ишчи учун бюджетдан ташқари Пенсия жамғармасига энг кам ойлик иш ҳақининг 50 фоизи миқдорида суғурта бадали ва якка тартибдаги иш берувчи тадбиркор учун белгиланган солиқ ставкасининг 30 фоизи миқдорида солиқ тўланади, холос. Шунингдек, якка тартибдаги тадбиркорлар касб-ҳунар коллежи битирувчиларини ишга ёллаган ҳолатда коллежни тамомлагандан бошлаб ўн икки ой мобайнида ёлланма ишчилар учун белгиланган солиқдан озод этилади.

Ўзбекистон Республикаси Солиқ кодексининг 375-моддасига киритилган ўзгартириш ва қўшимчаларга кўра, 2015 йилдан бошлаб касб-ҳунар коллежлари битирувчилари коллежни тамомлагандан кейин ўн икки ой ичида якка тартибдаги тадбиркор сифатида давлат рўйхатидан ўтган тақдирда, шу санадан эътиборан қатъий белгиланган солиқни тўлашдан олти ой муддатга озод этилади.

Умуман олганда, мамлакатимизда тадбиркорлик фаолияти билан шуғулланаман, оиламга, юртимга наф келтираман, деган ёшлар учун барча шароитлар яратилган. Ёшларни изланишга, ҳалол меҳнат қилиб, фаровон яшашга ундаш борасида амалга оширилаётган бундай хайрли ишлар ўз самарасини бермоқда.

Миршоҳид СУЛАЙМОНОВ, 

Мирзо Улуғбек туман давлат солиқ инспекцияси бошлиғи ўринбосари