Ёзда мўл-кўл бўлган сабзавотларнинг қиш фаслида нархи ҳам, қадри ҳам ошиши турган гап. Қишда организм дармондорига муҳтож бўлиб турганда помидору бодрингнинг сархил иси димоққа хуш ёқади. Айниқса, иссиқхона ичига кирган ҳар киши борки, дилига баҳорий кайфият инади.

Қорақалпоғистоннинг Амударё тумани «Тошёп» овулида истиқомат қилувчи Қуанчбек Боймуродов ташкил қилган иссиқхонада ҳозир помидорлар айни етилган пайт. Қолаверса, янги помидор ниҳолларининг ифори дилингизни яйратади.

Иссиқхона Манғит марказидан саккиз чақирим узоқликда жойлашган бўлиб, лойиҳанинг баҳоси 477 минг АҚШ долларига тенг. Қолаверса, маҳаллий аҳолидан 30 нафари шу лойиҳа ортидан иш билан таъминлаган. Ҳозирги кунда иссиқхонага помидор экилган бўлиб, ҳар ойда Нукус шаҳри бозорларига 40 тоннагача маҳсулот етказиб турилибди.

– Иссиқхонамизда май ойида пишиб етиладиган 25 минг туп помидор кўчатлари парвариш қилинмоқда. Ушбу иссиқхонанинг энг ноёб хусусияти эса у экологик тоза лойиҳа асосида ишлайди, – дейди Қуанчбек Боймуродов. – Яъни кўмир, табиий газ ва шунга ўхшаш атмосфера ҳавосини ифлословчи ёқилғилардан фойдаланилмайди.

Унда қорақалпоқнинг суякни қақшатадиган қора совуғида помидорлар қандай жон сақлаб қолади дейсизми? Иссиқхонани электр энергияси орқали ишлайдиган 44 та компрессор иситиб беради. Устки қисми эса қуёш нурларини меъёрий ҳолатда ўтказадиган япон технологиясига асосланган поликарбанат билан қопланган.

«Қаловини топсанг, қор ҳам ёнади», дейдилар. Ана шундай ишнинг кўзини билиб, «қорни ҳам ёндираётган», эл дастурхонига қишда ҳам ёздагидек сархил сабзавоту меваларни етказиб бераётган меҳнаткаш инсонларга тан бермай иложимиз йўқ. Улар салга тушкунликка тушадиган, мақсади сари интилмайдиган ҳар бир кишига ўрнак бўлишга арзийди.

Ўзбекистон Экологик партияси

Қорақалпоғистон Республика кенгаши матбуот хизмати