Юртимизда чорвачилик, паррандачилик билан бир қаторда қуёнчилик  ҳам ривожланмоқда. Бугун бу соҳани бемалол истиқболли бизнес, дейиш мумкин.

Косонсойлик Исмоилхон Юсупов буни амалда исботлаган тадбиркорлардан.

— Отамдан қолган катта боғда акам билан меҳнат қилардик, — дейди тадбиркор Исмоилхон ЮСУПОВ. — У ерда қуён борлигини билиб қолдик. Кейин кулранг ёввойи қуёнга кўзимиз тушди. Қувладик. Жуда чопоғон бўларкан, жонивор. Биз ҳам бўш келмай, ахийри тутиб олдик. Уч-тўрт кун ҳовлида боқдик. Хуллас, ҳаммаси шундан бошланди. «Қуёндан яхши даромад олса бўлади, сергўшт, териси ҳам қиммат — яхши сотилади», деган гапларни эшитиб, қуён парваришлашга қизиқиб қолдим. Худди «Ажойиб хаёлпараст» фильмидагидек… Қуён жуда тез кўпаяди, борган сари уларнинг сони ҳам ошиб кетди. Мана, ўн йилдирки, қуён боқиб келяпман. Қуён йилнинг барча фаслида болалайди. Йилига битта она қуён 3-6 марта, ҳар сафар ўртача 6-8 (баъзан 15 ва ундан ортиқ) тадан болалайди. Тез ўсади ва исталган иқлимга мослашади.

Ҳозир уйда қуённинг Фландр ва Bеликан зотини боқяпмиз. Мазкур қуёнларни парваришлаш қийин эмас, чунки улар ҳар қандай шароитга мослашувчан. Асосийси, овқатланиши назорат қилиб турилса бўлди. Баҳор-ёз ойларида ҳовлидан, боғдан ҳар хил ўтлар ўриб келиб, бир-икки кунга нами кетиши учун ёйиб қўйилади. Чунки янги узилган барра ўтда ҳар хил зарарли бактериялар бўлади. Куз-қишда эса ҳовлимиздан чиққан картошканинг майдаларини қайнатиб, туз сепиб берамиз. Қуёнлар ҳар хил омихта ем ҳам истеъмол қилаверади. Асосан, кўкат, сабзи-карам, майин хашак, дон-дун,  уларнинг севимли хўраги ҳисобланади. Яхши парваришланган қуён 8-12 килограммгача гўшт бериши мумкин.

Қуён гўшти тўйимли ва ундан парҳез таомлар тайёрлашда фойдаланилади. Тез ҳазм бўлади, юмшоқлиги ва хуштаъмлиги бўйича парранда гўштидан қолишмайди. Одатда, қон босими, жигар ва ошқозон касалликлари билан оғриган беморларга парҳез таом сифатида тавсия этилади. Қуёндан яна мўйна ҳам олинади.

Қуёнчиликдан олаётган даромадимиз ёмон эмас. Шу беозор жониворлардан олинаётган фойда ҳисобидан ўтган йили уйни тўлиқ таъмирдан чиқардик. Ўн-ўн бешта қўй олдик. Хонадонимиздан парҳез гўшт узилмайди. Бири кетса, ўрнини бошқаси қоплайверади. Яна бир муҳим жиҳати, улар учун кўп маблағ сарфланадиган қурилиш талаб қилмайди. Ҳовлининг бир четидан жой ажратилса, бас.

Қуёнларнинг соғлиғига алоҳида аҳамият бериш лозим. Соғлом қуён тез ўсади. Улар орасида касаллик тарқалишининг олдини олиш чораларини кўриш талаб этилади.

Ҳақиқатдан ҳам, қуёнчилик соҳасидан тузуккина даромад олаётган, дастурхонини бут қилаётган ҳамюртларимиз кўп. Исмоилхон аканинг айтишича, Ўзбекистонда қуёнлар асосан, гўшт ва мўйнаси учун боқилади. Мўйнасидан болалар пальтоси, телпак, ёқа, пойабзал тайёрланади.

Дилфуза ТИЛЛАЕВА

тайёрлади.