Бу йил март ойи аномал ёмғирли бўлди. Республика ҳудудининг катта қисмида ёғингарчилик миқдори ойлик меъёрга нисбатан одатдагидан 2-3 марта, баъзи жойларда 3,5-4,5 марта кўп бўлди, дея хабар бермоқда Ўзгидромет маркази.

Тошкент, Жиззах, Сирдарё, Андижон, Фарғона, Наманган вилоят­ларида март ойидаги ёғингарчилик бутун метеорологик кузатувлар туркуми бўйича рекорд даражада бўлди.

Март ойининг ўтган даври учун Тошкент шаҳрида ёғингарчилик 186 мм бўлиб, бу март ойининг аввалги 1969 йилги рекордини янгилади.

Хўш, апрель ойида бизни қандай об-ҳаво кутмоқда?

Жорий йилнинг апрель ойи асосан қуруқ ва илиқ об-ҳаво билан бошланади.

Ойнинг биринчи ҳафтасида кундузги ҳарорат 17-22° дан 23-28° гача, жанубда баъзи жойларда 30-33° гача кўтарилади. Фақат 2 апрелда Тошкент, Жиззах, Сирдарё вилоятларининг айрим жойларида ва Фарғона водийсининг тоғ олди ва тоғли ҳудудларида ёмғир ёғиши мумкин.

Ўзгидромет прогнозига кўра, апрель ойида ҳаво ҳарорати кечалари 3-8° илиқдан 10-15° илиқгача, кундуз кунлари 13-18° илиқдан 23-28° илиқгача, республика жанубида 30-33° илиқгача ўзгариб туради.