Олий Мажлис Қонунчилик палатасининг Аграр ва сув хўжалиги масалалари қўмитаси аъзолари Фарғона вилояти Олтиариқ туманида бўлиб, аҳоли томорқаларидан самарали фойдаланиш ҳолатларини ўрганди.

Олтиариқ узумлари довруғи узоқ-узоқларгача танилган. Маҳалла бўйлаб юрар экансиз, ҳар икки хонадоннинг бири узумчилик билан шуғулланаётгани гувоҳи бўласиз.

Депутатлар маҳаллама-маҳалла, хонадонма-хонадон юриб, фуқароларнинг 8 сотих томорқадан 20 миллион сўмгача даромад топаётганини кўришди.

– Олтиариқликлар ерни эъзоз­лашади. Узумчилик бизга ота касб, шу билан бирга, сердаромад соҳа. Биз фақат узумдан олинадиган даромадга қараб қолмаймиз. Узум пишгунича тагида бодринг, помидор, бақлажон ва қалампир каби маҳсулотларни етиштирамиз, – дейди маҳаллий аҳоли вакиллари.

Ишчи гуруҳ аъзолари ўрганиш­лари давомида туманнинг узумчилик соҳасини юртимиз бўйлаб оммалаштириш, янги навларни яратиш ва инновацион усулларни ҳаётга татбиқ этиш бўйича  ўз таклифларини билдирди.

Кейинги йилларда мамлакатимизда узумчилик соҳасида қатор ишлар амалга оширилиб, янги навлар яратиш, экспортбоп ва саноатбоп узум навларини кўпайтириш, токзорлар майдонини кенгайтириш борасида салмоқли натижаларга эришилганини таъкидлашди.

Суҳбат чоғида ўз ҳовлисида иссиқхона ташкил этиб, бозорларимиз тўкинлигига ҳисса қўшаётган томорқачиларни 20 август – Тадбиркорлар куни билан самимий табриклади.

Ишчи гуруҳ аъзолари ўрганишлари давомида Ўзбекистон Қаҳрамони Лола опа Муротова хонадонида ҳам бўлишди. Опанинг шогирдлари ва ишчилари билан суҳбатлашиб, унинг эришган муваффақиятларини хотирлашди.