Янги йил арафасида болажонлар учун ажойиб туҳфа! «Чемпион» номли янги фильм суратга олинди.

«Болажон» телеканали буюртмасига биноан «Ўзбектелефильм» давлат муассасаси томонидан тасвирга олинган «Чемпион» фильми болаларда ақл гимнастикаси бўлмиш шахмат ўйинига қизиқиш уйғотади. Фильм қаҳрамони Шоҳруҳ шахматни тушунмайдиган, табиатан бўшанг бола. Бироқ ўтмишдан келган бобоси уни қўллаб-қувватлайди. Унга қадимий шатранж ўйинини ўргатади. Айнан мана шу ўйинлар асносида ўтмишдаги воқеалар гавдаланади.

Ўтмиш ва замонамизни туташтирувчи бу воқеаларда эрк ва адолат йўлидаги курашлар ҳам акс этиб, унда инсон заковати ҳар қандай қўшиндан устунлиги намоён бўлади. Яъни, шатранж ўйинидаги баҳсда мағлуб бўлган золим шоҳ Қоражон ғолиб чолнинг юртини ишғол қилмасликка ваъда беради.

«Чемпион» фильмида инсон астойдил хоҳласа, ҳар қандай ишни уддалай олиши, ютуқларни қўлга киритиши мумкинлиги акс этади. Зеро, «Ёшликда олган билим тошга ўйилган нақшдир», деб бежиз айтишмаган. Фильмда ҳар бир бола билимли, ғайратли ва шижоатли бўлиши, бунинг учун синов ва машаққатлардан чўчимаслиги каби ғоялар илгари сурилган.

Сценарий муаллифи Баҳриддин Қўшмонов. Режиссёр Фарҳод Худойбердиев. Тасвирчи Аваз Искандаров. Фильмда бош ролларни Озодбек Ҳайитбоев, Ўзбекистон халқ артисти Муҳаммадсоли Юсупов, маҳоратли актёрлар Маъруф Отажонов, Фарҳод Худойбердиев, Нурмуҳаммад Абдумаликов, Мирсолиҳ Азизов ва бошқалар ижро этишган.

Қизиқарли ва қувноқ саргузаштларга бой «Чемпион» фильми премьераси 30 декабрь соат 19.10 да «Болажон» телеканалида намойиш этилади.