Янгиланаётган Конституциямизнинг 49-моддасида ҳар ким соғлом ва қулай атроф муҳитга, унинг ҳолати ҳақидаги ҳаққоний ахборотга эга бўлиши бўйича киритилаётган нормалар атроф муҳитга таъсири кучли бўлган субъектларнинг ҳамда мансабдор шахсларнинг табиат ҳимояси учун масъулиятини кескин оширишга хизмат қилади.

Давлат фуқароларнинг экологик ҳуқуқларини таъминлаши, атроф муҳитга зарарли таъсир кўрсатилишига йўл қўймаслик мақсадида шаҳарсозлик фаолияти соҳасида жамоатчилик назоратини амалга ошириш учун шарт-шароитлар яратишига доир конституциявий норманинг белгиланиши бугунги куннинг энг муҳим талаби, десак хато бўлмайди. Чунки, сўнгги уч йилда қурилишлардан норози бўлган аҳолидан 15 мингдан ортиқ мурожаатлар бўлган, судлар томонидан биргина Тошкент шаҳрида 200 дан зиёд қурилишлар тўхтатиб қўйилган

Шаҳарларнинг бош режаларини жамоатчилик муҳокамасидан мажбурий ўтказилиши шартлиги ҳақидаги конституциявий қоида ҳозирги шароитда тобора долзарб аҳамият касб этиб бораётган шаҳарсозликка оид масалаларни халқимиз билан бамаслаҳат ечиш имконини беради.

Бугун Оролбўйи минтақасида юзага келган глобал экологик муаммо минтақа аҳолисининг ҳаёт тарзига салбий таъсир кўрсатмоқда. Шу боис, Ўзбекистон Орол муаммоси оқибатларини бартараф қилишга алоҳида эътибор қаратмоқда. Хусусан, 2018 йилдан шу кунга қадар Орол денгизи тубининг 1,8 млн гектарида кўкаламзорлаштириш ишлари амалга оширилди. Шунингдек, Орол ва Оролбўйидаги мураккаб экологик вазият, аҳоли генофондини муҳофаза қилиш, саломатлигини яхшилаш ҳамда ушбу ҳудудда барқарор ривожланишни таъминлашга қаратилган кенг кўламли лойиҳалар амалга оширилмоқда.

Янги Конституцияда Оролбўйи минтақасининг экологик тизимини муҳофаза қилиш ва тиклаш, уни ижтимоий ва иқтисодий жиҳатдан ривожлантириш бўйича давлат томонидан чоралар кўрилиши мустаҳкамланмоқда. Бу норма минтақа аҳолиси учун муносиб яшаш шароитларини яратилишини ва турмуш даражаси яхшиланишини таъминлайди.

Камол ЖУМАНИЁЗОВ,

ЎЭП Марказий кенгаши

раиси ўринбосари,

Олий Мажлис

Қонунчилик палатаси

Депутати