Жиззах вилоятининг чўл туманларида бугунги кунда қишлоқ хўжалигининг барча тармоқлари ривожланмоқда. Ўтган йиллар давомида фермерлик ҳаракатини ҳар томонлама қўллаб-қувватлаш ва янада ривожлантириш, соҳага илғор тажрибаларни татбиқ этиш борасида амалга оширилган ишлар улкан самара бермоқда.

Айниқса, кўп тармоқли фермер хўжаликларининг ташкил этилиши сифатли озиқ-овқат маҳсулотлари етиштириш ва аҳоли фаровонлигини юксалтиришда муҳим омил бўлди. Жиззах вилоятидаги 3 минг 216 фермер хўжалиги кўп тармоқлига айлантирилди ва бу билан 21 мингдан зиёд янги иш ўрни яратилди. Шунингдек, кўп тармоқли фаолият юритиш фермерларга қўшимча даромад келтириш билан бирга, алмашлаб экиш имкониятларини кенгайтириб, тупроқ унумдорлигини оширишга хизмат қилмоқда. Илгари ўз хўжалигининг ички эҳтиёжлари учун мева-сабзавот, полиз экинлари эккан фермерлар энди фақат ички бозорга эмас, хорижга ҳам маҳсулот экспорт қилмоқда.

— Мамлакатимизда фермерларга яратилаётган кенг имкониятлардан фойдаланиб, унумдорлиги пасайиб кетган 50 гектар майдонга полиз экинлари экдик, — дейди Мирзачўл туманидаги «Акбар сокин» фермер хўжалиги раҳбари М.ПИРИМҚУЛОВ. — Ўзимизнинг маҳаллий нав қовун уруғидан яхши ҳосил олдик. Ички бозордан ортганини хорижга сотиб, яхшигина даромад кўрдик. Олинган даромад эса хўжалигимизнинг бошқа тармоқларидаги агротехник тадбирларни ўз муддатида бажаришда қўл келди.

Бу йил вилоятнинг Сирдарё ҳавзасидан суғориладиган барча туманларида полиз экинларидан яхши ҳосил олинди. Бу вилоят бозорларида қовун-тарвуз ва ошқовоқнинг сероблиги, арзонлигида ҳам кўринади. Айнан шундай серобчиликни мева-сабзавот маҳсулотлари савдосида ҳам кузатиш мумкин. Вилоятда боғдорчилик ва узумчилик йўналишидаги фермер хўжаликлари сони ҳам 400 га етди. Бу тармоқларни Бахмал, Ғаллаорол, Жиззах, Зомин, Фориш, Янгиобод каби тоғ­олди туманларида янада ривожлантиришга алоҳида эътибор қаратилмоқда. Ушбу ҳудудларда интенсив агротехнологияларга асосланган 352 гектар боғ ва 374 гектар токзор барпо этилди.

— Хўжалигимизда 9,8 гектар майдонда боғ, жумладан, 4 гектар интенсив боғ барпо этдик, — дейди Бахмал туманидаги «Элёр Эргашев» фермер хўжалиги раҳбари Холиқназар АҲМЕДОВ. — Айни пайтда маҳсулотимизни хорижга экспорт қилишга тайёрламоқдамиз.

Кўп тармоқли фермер хўжаликларини ривожлантиришда эришилаётган самаралар бозорга, элимиз дастурхонига барака киритиш билан бирга, мамлакатимиз экспорт салоҳиятини оширмоқда.

Тошқул БЕКНАЗАРОВ