Охирги йилларда жаҳонда сув ресурс­ларини рационал бошқариш ва ундан самарали фойдаланишни таъминлаш дунё мамлакатларининг барқарор иқтисодий тараққиётида муҳим аҳамият касб этувчи масалалардан бирига айланган. Аҳоли сони ўсиб, глобал иқлим ўзгаришлари ёғинлар миқдорига кескин таъсир кўрсатаётган бугунги шароитда сувга бўлган талаб тобора ортмоқда.

Ўзбекистон Экологик партияси фаолларининг Янги аср университети талаба ёшлари билан ўтказган давра суҳбати ана шундай долзарб мавзуда бўлди.

Олий Мажлис Сенатининг Оролбўйи минтақасини ривожлантириш масалалари ва экология қўмитаси раиси ўринбосари Ботир Матмуратов, Ўзбекис­тон Экологик партияси Тошкент шаҳар кенгаши раиси Севара Файзиева университет профессор-ўқитувчилари ҳамда талаба-ёшларга атроф-муҳит муҳофазаси, бугунги кундаги энг оғир экологик муаммолар, уларнинг келиб чиқиш сабаблари тўғрисида атрофлича гапириб беришди.

– Бу каби тарғибот-ташвиқот тадбирлари орқали биз ҳар бир инсонда табиий ресурсларга тўғри муносабатда бўлиш кўникмасини шакллантира олсак, она табиатни мусаффо сақлаш ҳамда ундаги неъматлардан оқилона фойдаланиш борасида мақсадга эришган бўламиз, – деди сенатор Ботир Матмуратов.

Тадбир якунида меҳмонлар, профессор-ўқитувчилар ва талабалар билан биргаликда университет ҳовлисига дарахт кўчатлари ўтқазишди.