Орол денгизининг қуриган туби ҳудудида қарийб 600 минг гектарлик майдонда шўр ва нам тупроқда ўрмонзорлар барпо этиш мақсадида биринчи марта ноёб ўсимлик – Арундо қамиши тажриба майдонида синовдан ўтказилмоқда.

Шўрхок тупроққа ва сувсизликка чидамли ушбу ноёб ўсимлик нафақат туз билан шамолнинг олдини олишга қодир, балки ундан қурилиш ва маиший хўжаликларда ҳам кенг фойдаланиш мумкин.

Экология, атроф-муҳитни муҳофаза қилиш ва иқлим ўзгариши вазирлиги ташаббуси билан Ўрмон хўжалиги илмий-тадқиқот институти профессори, ЎЭП фаоли Зиновье Новицкий бошчилигида ушбу ноёб қамиш тури тажриба тариқасида илк бор экилмоқда.

Ҳозирда ўсимликлар бир ойлик. Улар қурғоқчиликка чидамли бўлгани боис оғир чўл шароитида ҳам тўрт метргача ўса олади. Унинг экиш технологияси ноёблиги шундаки, экиш жараёнида кўчатлар ўрнига илдиз куртаклари ўтқазилади.

– Булар Орол денгизининг қуриган туби учун бошқа ҳудудлардан олиб келинган. 1-2 йил ичида Оролнинг барча ҳудудларида Арундо қамиши экилади, чунки илдиз сўрғичлари тез униб чиқади. Ушбу ўсимлик тузли шамолларнинг олдини олади, унинг поясидан қурилишда, тўқимачиликда фойдаланилади, шунингдек, уни ем-хашак сифатида ҳам ишлатиш мумкин, – дейди эколог олим З.Новицкий.