Ҳозирги кунда дарахтларга турли хил мазмундаги, эълонлар ва чироқ мосламаларини осиш, бундан ташқари, йўлакларни таъмирлаш баҳонасида дарахтларнинг тагини бетонлаб ташлаш айрим «тадбиркорлар» учун одатга айланиб бормоқда.

Улар бу қилмишлари билан дарахтларга шикаст етказиб, уларнинг нафас олиши, ривожланишига тўсқинлик қилмоқда.

Мана шундай нохуш ҳолатларни бартараф этиш мақсадида жорий йилнинг июль ойи давомида ҳудудларда «Дарахтга нафас беринг» оммавий тадбирлари ўтказилиши белгиланган. Шу боисдан Қашқадарё вилояти Экология бошқармаси ҳамда Экопартия масъуллари томонидан дарахтлар илдизини бетон ва асфальт қопламалардан, турли хил чироқ мосламаларидан, реклама баннерлари ва шитлардан бўшатишга қаратилган акция ўтказиб келинмоқда.

Қашқадарё вилояти Чироқчи туманида ўтказилган рейд тадбири давомида туманнинг марказий кўнгилочар ҳамда жамоат жойларида дарахтларга турли хил мазмундаги плакатлар, эълонлар осилган ҳолатлар аниқланди. Шунингдек, «Кўкдала» маҳалласи ҳудуди назорат қилинганда ҳам жамоат жойлари, автомобиль йўли ёқаларидаги дарахтларга турли хил мазмундаги плакатлар осилган эди. Шаҳрисабздаги «Ипак йўли» ҳамда «Камолот» маҳаллалари ҳудудларида ҳам айни ҳолат, дарахт илдизлари бетон ва асфальт билан қопланган. Дарахтлар эса гўё эълонлар тахтаси вазифасини ўтамоқда.

Ўрганиш давомида ушбу ҳолатларни келтириб чиқарган тадбиркорлар аниқланиб, соҳа мутахассислари томонидан тушунтириш ишлари олиб борилди. Уларга юқоридаги каби ҳолатларни қайта такрорламаслик, акс ҳолда, Ўзбекистон Республикаси МЖтКнинг тегишли моддалари билан жаримага тортилиш мумкинлиги тўғрисида огоҳлантирилди. Осилган барча эълон ва чироқлар дарахтлардан олиб ташланди.