Ривожланган давлатларда жамоатчилик назорати жамиятни бошқарувчи асосий куч деб қаралади. Экология, атроф-муҳитни муҳофаза қилиш ва мувозанатни сақлашда жамоатчилик назоратининг ўрни катта.

Ўзбекистон Экологик партияси Хоразм вилояти кенгаши ҳам партия дастурий мақсадларини амалга ошириш, электорат манфаатларини таъминлашда изчил жамоатчилик назоратига таянади. Бу борада, хусусан, ижтимоий тармоқ фаоллари, оммавий ахборот вакиллари ҳамда блогерлар билан яқиндан ҳамкорлик ўз самарасини бермоқда.
Партия ташкилоти томонидан Демократик жараёнларни таҳлил қилиш маркази Хоразм вилояти бўлинмаси билан биргаликда жойларда ўтказилаётган семенар-тренинг ва давра суҳбатлар жамоатчилик фикрининг институт даражасида шаклланишида муҳим омил бўлмоқда.
Ўзбекистон Экологик партияси энг ёш сиёсий куч бўлишига қарамай ўтган беш йил мобайнида аҳоли ўртасида ҳурмат-эътибор ва ишонч қозонишга улгурди, десак муболаға бўлмайди. Партиянинг барча бўғин ташкилотларига жойларда учраётган муаммолар, ечимини кутаётган масалалар юзасидан мурожаатлар кўпаяётгани буни исботлаб турибди.
Ўтган давр мобайнида жамоатчилик назорати кўмагида жойларда кўплаб кўнгилсиз ҳолатлар аниқланиб, аҳвол яхшиланишига туртки берилди. Жумладан, Хоразм Миллий табиат боғига туташ ҳудудда «Амударё олтин балиқ» фермер хўжалиги томонидан ўзига ажратилган ер майдонидан ташқарига чиқиб, катта ҳимоя чегаралари бузиб ташлангани жамоатчилик эътирозига сабаб бўлди. Аҳвол ўрганилганида фермер бу ерларга шоли экиш мақсадида сув очиб юборган. Натижада, янги экилган гужум кўчатлари сув остида қолиб, уларнинг бир тўкисда ривожланиши учун жиддий хавф туғилган.
Хоразм Миллий табиат боғи маъмурияти томонидан фермер хўжалигига бир кун муддатда сув чиқариб юборилмаса, 3000 дан зиёд кўчат нобуд бўлиши ва бу маъмурий жавобгарликка тортилиши юзасидан огоҳлантириш хати берилди ва кўчатлар сақлаб қолинди.
«Яшил макон» умуммиллий лойиҳаси доирасида мана шундай жамоатчилик назорати тадбирларини мунтазам олиб бориш диққат марказимизда. Жумладан, эрта баҳорда «Янгиариқ – Хонқа» йўлида жойлашган бўш майдонга 2000 га яқин кўчат экилган эди. Лекин кўчатлар парваришланмагани, умуман, суғорилмагани сабабли 90 фоизи ривожланмасдан қолиб кетгани аниқланди.
Яқинда ижтимоий тармоқларда Урганч тумани «Қумравот» маҳалласи ҳудудида жойлашган бўш майдонга 500 га яқин кўчат экилгани ва улар энди куртак очишига қарамасдан аёвсиз қўпориб, яна устига тош ҳам ташлаб кетилгани акс этган видео тарқалди. Ушбу ҳолат юзасидан айни кунларда Ўзбекистон Экологик партияси Хоразм вилоят кенгаши вакиллари томонидан ўрганиш ишлари олиб борилмоқда.
Гурлан тумани «Шоликор» кишлоғи, «Чинобод» маҳалла фуқаролар йиғини ҳудудида жойлашган чиқиндихона 3,6 гектар бўлиб, 228 минг 200 тонна сиғимга эга. Янгибозор тумани «Бошкирших» кишлоғи «Жайҳун» маҳалла фуқаролар йиғини ҳудудида жойлашган чиқиндихона 5 гектар бўлиб, 190 минг тонна чиқиндилар тўпланган. Мазкур чиқиндихоналарнинг экосанитария ва техник ҳолати қоида талабларига жавоб бермаслиги аниқланди. Бу ҳудудларда чиқиндилар ўз вақтида йўқ қилиниши юзасидан тегишли мутасаддилар билан маслаҳат-келишувлар олиб бориляпти.
Бир сўз билан айтганда, жамоатчилик назорати – тараққиёт омили. Буни чуқур англаган ҳолда аҳоли ўртасида мазкур жиҳатларнинг институт мақомида шакллантириш бизнинг бош мақсадимизга айланган.

Қурбонназар САФОЕВ,
ЎЭП Хоразм вилоят кенгаши раиси ўринбосари