Ўзбекистон Экологик партиясидан Олий Мажлис Қонунчилик палатаси ҳамда маҳаллий Кенгашлар депутатлигига кўрсатилган номзодлар тарғибот тадбирларини ҳар бир маҳаллага кириб бориб, уйма-уй юриб олиб бормоқда.

Бундан кўзланган мақсад эса тарғибот тадбирлари таъсирчанлигини ошириш, партия ва номзодларнинг сайловолди дастурида белгиланган вазифалар билан сайловчиларни яқиндан таништиришдир.

Самарқанд вилояти округидан Олий Мажлис Қонунчилик палатаси депутатлигига номзод Даврон Ачилов Пайариқ туманидаги бир неча маҳалларда бўлиб, экологик тоза маҳсулотларни ишлаб чиқарувчи тадбиркорлик субъектларини қўшилган қиймат солиғи (ҚҚС)дан озод этиш, шаҳар ҳудудларида тез-тез учраб турадиган сув тошқинларининг олдини олиш мақсадида дренаж тизими муаммоларини ҳал этиш масалалари партиянинг Сайловолди дастуридан ўрин эгаллаганини айтиб ўтди. Бу таклифлар сайловчиларнинг Ўзбекистон Экологик партиясига бўлган ишончини мустаҳкамлаб, хайрихоҳлигини оширмоқда.

Хоразм вилоятида ҳам Ўзбекистон Экологик партиясидан депутатликка кўрсатилган номзодлар маҳаллама-маҳалла, уйма-уй юриб, сайловолди тарғиботини фаол олиб боришмоқда. Хонқа туманидан кўрсатилган номзодлар Сабоҳат Худайберганова ва Нодирбек Ахмедовлар «Жингён»  ҳамда «Гулистон» маҳаллалари аҳолиси билан учрашиб, партия ҳамда ўзининг сайловолди дастуридаги ташаббуслар билан таништирди. Айниқса, дарахтзорлар мавжуд бўлган ер майдонларини қурилиш мақсадларида реализация қилинишини қонун билан тақиқлаш, 10 ёшдан катта дарахтларни кўчириб ўтказишга бутунлай чеклов қўйиш, керак бўлса, қурилиш мақсадларида дарахтларни ноқонуний кесган тадбиркорларнинг ерга бўлган ҳуқуқини бекор қилиш тартибини жорий қилиш каби ташаббуслар сайловчиларга манзур бўлди.