Европа яшил партиялари октябрда иқлим ўзгаришига қарши курашиш, атроф-муҳитни муҳофаза қилиш ва жамиятда экологиянинг аҳамиятни ошириш учун бир қатор тадбирлар ўтказади.

Жумладан, Германия, Франция ва Буюк Британиядаги яшиллар партиялари атроф-муҳитга зарар етказувчи фаолиятга қарши иш олиб бориб, аҳоли ва ҳукумат билан биргаликда ҳамкорлик қилишга фаол ҳаракат қилмоқда.

Германия: йил сарҳисоби

Германиянинг яшиллар партияси Европа яшиллар ҳаракатида катта таъсирга эга. Хусусан, партия айни дамда мамлакатни янада барқарор энергия манбаларига ўтишга жалб қилиш учун ҳаракат қиляпти. Улар қайта тикланувчи энергия ресурслари, жумладан, шамол ва қуёш энергиясини кўпайтириш устидаги лойиҳаларни қўллаб-қувватлашмоқда. Партия яқиндагина иқтисодий ўсишнинг «яшил йўли»ни тарғиб қилиб, саноат ва транспорт соҳаларида углерод изини камайтириш бўйича таклифлар киритди. Бундан ташқари, мамлакат «яшиллари» Европада 2040 йилгача тўлиқ иқлим нейт­раллигига эришишни мақсад қилган. Айни шу сабаб улар лойиҳа доирасида Германиянинг ички сиёсатига ушбу мақсадларни сингдиришга бел боғлаган. Лойиҳа асосан ёқилғиларни камайтириш, яйловларни тиклаш ва биологик хилма-хилликни ҳимоя қилиш каби чораларни ўз ичига олади.

Партия октябрь ойининг ўрталарида ижтимоий тарғибот ишларига ҳам зўр берди. Жумладан, партия турли экологик тадбирлар уюштириб, аҳолини иқлим ўзгариши ва унинг салбий оқибатларига жалб қилиш учун шаҳарларда велосипед йўлаклари, электромобиллар ва жамоат транспорти инфратузилмасини яхшилашга эътибор қаратишди.

Шахсий автомобилларга чеклов – Франция

Бироз вақт давом этган «сустлик»дан сўнг, Франция яшиллар партияси иқлим ўзгаришига қарши қаттиқ курашга чоғланди. Улар октябрь ойида бир қатор ло­йиҳалар устида иш олиб боришди. Жумладан, партия шаҳар инфратузилмасини яхшилаш мақсадида Париж ва бошқа катта шаҳарларда ҳаво сифати муаммосини камайтиришга ҳаракат қилмоқда. Шу сабаб партия шаҳарларда кўпроқ велосипед йўлаклари ва электромобиль инфратузилмасини ривожлантиришни қўллаб-қувватлаб, ҳукуматга шахсий автомобиль ҳаракатини чеклаш ташаббусини киритди. Бу иқлим ўзгаришига қарши курашишда муҳим қадам сифатида кўрилмоқда.

Бундан ташқари Франция «яшиллари» ҳукумат ва Европа Иттифоқи раҳбариятидан иқлим ўзгаришига қарши қатъий чораларни кўришни талаб қилишни бошлади.

Улар табиатни муҳофаза қилиш, экологик тозаланган маҳсулотлар ишлаб чиқариш ва биоанъанавий усулларни ривожлантириш масалаларига урғу беришмоқда.

Буюк Британия яшил ҳаракатлари

Англия ва Уэлс яшиллар партиялари Буюк Британияда «Brexit»дан кейинги янги шароитда иқлим ўзгаришига қарши иш олиб боришда бир қатор қийинчиликларга дуч келди. Лекин партия ўзининг экологик дастурини кенгайтириш ва амалга оширишни давом эттирмоқда. Хусусан, қайта тикланувчи энергия манбаларини кенгайтириш мақсадида партия Британиянинг қайта тикланувчи энергия манбаларини, жумладан, шамол, сув ва қуёш энергиясини ривожлантиришга катта аҳамият беришни таклиф қилди. Улар аҳолини энергия тежамкорлигини оширишга чақириб, энергия самарадорлигини яхшилаш учун қатор тадбирлар ташкил қилди.

Шу билан бир қаторда, партия иқлим ўзгариши оқибатларини камайтириш учун мамлакатда табиатни муҳофаза қилиш бўйича дастурларни жорий қилиш ва яйловларни тиклаш бўйича чора-тадбирларни таклиф қилишни давом эттирмоқда. Бу, шунингдек, қишлоқ хўжалигида экологик тозаликка асосланган усулларни тарғиб қилишни ҳам ўз ичига олади.

Европада яшиллар партиялари иқлим ўзгаришига қарши курашиш ва экологик барқарорликни таъминлаш мақсадида қатор муҳим ишларни амалга оширмоқда. Улар қайта тикланувчи энергия манбаларини ривожлантириш, аҳоли ўртасида экологик билимларни ошириш ва табиатни муҳофаза қилиш бўйича кўплаб лойиҳаларни давом эттирмоқда. Олиб борилаётган бу ҳаракатлар Европада атроф-муҳитни сақлаб қолишда ва иқлим ўзгариши билан боғлиқ муаммоларни юмшатишда муҳим аҳамият касб этади.

Нилуфар УБАЙДУЛЛАЕВА

Шарҳи