Бугунги кунга қадар хотин-қизларнинг сиёсий фаоллигини оширишда партияларнинг ролини кучайтириш борасида кенг кўламли ишлар амалга оширилмоқда. Ўзбекистон Экологик партиясининг аъзолари 638 минг нафардан ошди. Шундан 320 730 нафари, яъни 51 фоизини хотин-қизлар ташкил этади.

Жорий йилда партия сафига ҳудудлардаги 312 нафар аҳоли ўртасида обрў эътиборга эга бўлган, фаол хотин-қизлар қабул қилинди. Партиянинг фаоллари иштирокида «Экологик тарбия оиладан бошланади», «Соғлом аёл – жамият таянчи!», «Экология болалар нигоҳида», «Соғлом турмуш тарзига риоя қиламиз!» каби 9 минг 300 дан ортиқ лойиҳалар амалга оширилди. Уларда жами 56 минг 587 нафар ёшлар қамраб олинишига эришилди.

Ўзбекистон Экологик партияси томонидан Тошкент давлат иқтисодиёт университетида «Экологияни асраш — соғлом келажак гарови» республика конференциясида «Ёш экологлар» қаноти ҳамда «Экология ва саломатлик» аёллар клубининг республика Кенгаши таъсис этилиб, Кенгаш аъзолари сайланди.

Конференцияда Олий Мажлис Қонунчилик палатасидаги Ўзбекистон Экологик партияси фракцияси раҳбари, партия Марказий Кенгаши раиси Абдушукур Ҳамзаев сўзга чиқди.

— Мамлакатимизда экологик барқарорликка эришиш йўлида жуда катта ишлар олиб борилмоқда. 2025 йил «Атроф-муҳитни асраш ва яшил иқтисодиёт йили», деб эълон қилиниши бу йўлдаги яна бир катта воқеа, десак хато бўлмайди.

«Экология ва саломатлик» аёллар клуби ҳамда «Ёш экологлар» қанотини ташкил этишдан мақсад партиямизнинг кўп минг сонли ёшлари ва аёлларимиз орқали аҳолининг экологик маданиятини ривожлантириш, ўсиб келаётган авлод ҳамда хотин-қизларнинг атроф-муҳитга бўлган муносабатини ўзгартиришдир, – деди А.Ҳамзаев.

Ўзбекистон Экологик партияси «Ёш экологлар» қаноти республика кенгаши раиси этиб Ферузбек Сайфуллаев сайланди.

 – Бугун экологик муаммоларга ечим топишда ёшларнинг ўрни жуда муҳим. Ота-боболаримиздан бизга омонат бўлиб келган она заминни келгуси авлодларга аслича мерос қолдириш – бизнинг бурчимиз. Биз омонатдан фойдаланяпмиз, сарфлаяпмиз, лекин баъзида бурчимизни унутиб қўйяпмиз.

«Ёш экологлар» экологик маданиятгача бўлган босқич – экологик саводхонликни оширишда ҳам қатор вазифаларни ўз олдига мақсад қилиб қўйган. Инсонларга «у ерга чиқинди ташлама, бундай қилма» дейишдан аввал, нима учун плас­тик чиқиндиларни табиат бағрига ташламаслик кераклигини, пластик неча йилда парчаланиши ҳақидаги тушунчалар билан таништиришимиз зарур. Барча ватандошларимизнинг экологик саводхонлигини ошириш учун аввало экологик маданият нима эканини содда тилда тушунтиришимиз керак. Бизнинг қанотнинг вазифаси ҳам шу, – дейди Ферузбек Сайфуллаев.

Партия қошида «Экология ва саломатлик» аёллар клуби ҳамда «Ёш экологлар» қаноти кенгашларининг ташкил этилишидан мақсад мамлакатимиз бўйлаб аёллар ва ёшлар орқали экологик маданиятни кенг тарғиб қилиш, иқлим шароити оғир бўлган ҳудудларда аёллар саломатлигига эътибор қаратиш, тенгдош-тенгдошга тамойили асосида ўсиб келаётган авлоднинг атроф-муҳитга бўлган муносабатини ўзгартиришдан иборатдир.

Тадбирда «Экология ва саломатлик» аёллар клуби ҳамда «Ёш экологлар» қанотининг ҳудудий кенгашлари раисларига ишонч ёрлиғи ҳамда гувоҳномалар топширилди.

Мафтуна БАХТИЁРОВА