Инсоннинг атроф-муҳитга тажовузкорона муносабати бугунги кундаги энг йирик экологик таҳдид аслида. Мутахассислар бундай муносабатнинг ўзгаришсиз қолиши келажакда катта муаммолар тизимини юзага келтириши мумкинлигини тахмин қилишяпти.

Экология, атроф-муҳитни муҳофаза қилиш ва иқлим ўзгариши вазирлиги Экологик назорат инспекцияси ўтказаётган рейдлар давомида табиатга етказилаётган катта талафотлар аниқланмоқда. Чирчиқ дарёси ҳудудида навбатдаги назорат тадбирларида худди шундай ҳолат кузатилди.

Рейд давомида фуқаро А.Қ. «Волво» русумли экскаватор ҳамда иккита «HOWO» русумли юк транспорт воситаси ёрдамида дарёдан табиий қум-шағал қазиб, тош майдалаш цехига ташиб олиб кетаётгани аниқланди. Оқибатда «Табиатни муҳофаза қилиш тўғрисида»ги ҳамда «Ер ости бойликлари тўғрисида»ги қонун талаблари бузилган.

Қонунбузарлик натижасида табиатга 674 млрд 48 млн 699 минг сўм миқдорида зарар етказилган. Давлат инспекторлари томонидан транспорт воситалари ҳолатга ойдинлик киритилгунга қадар жарима майдонига қўйилган.

Ҳолат юзасидан тўпланган ҳужжатлар ҳуқуқий баҳо бериш ва айбдорларга нисбатан қонуний чора кўриш мақсадида Бош прокуратурага юборилган.

Она табиатга муносабат шахсий манфаатлар, даромад ва бойлик орттириш каби муваққат ишлардан юқори тутилмас экан, экотизимлар инсон тажовузидан омон бўлолмайди. Бу масала ҳар биримизнинг, аввало, виждонимиз, келажак олдидаги масъулиятимизда акс этмоғи шарт.