Нукус шаҳрида экологик маданият ва атроф-муҳитга эҳтиёткор муносабатни шакллантириш мақсадида «Эко квест – Нукус-2025» мусобақаси бўлиб ўтди.

Мусобақа Қорақалпоғис­тон Республикаси Экология, атроф-муҳитни муҳофаза қилиш ва иқлим ўзгариши вазирлиги ҳамда Ўзбекистон Экологик партияси Нукус шаҳар кенгаши ҳамкорлигида ташкил этилди.

– Иштирокчилар бир қатор экологик топшириқларни бажардилар, шунингдек, атроф-муҳитни муҳофаза қилишга оид билим ва кўникмаларини намойиш этишди. Мусобақадан кўзланган мақсад, ёшлар ўртасида экологик тафаккурни юксалтириш, жамоатчиликни экологик муаммоларга бефарқ бўлмасликка чақириш бўлди, – дейди ЎЭП Нукус шаҳар партия ташкилоти раиси Арухан Исмайлова.

«Эко квест – Нукус-2025» нафақат беллашув, балки ҳамкорлик, ташаббус­корлик ва табиатга меҳр руҳида ўтган ижтимоий-ахборот платформасига айланди. Тадбир якунида энг фаол иштирокчилар ташкилотчилар томонидан диплом ва эсдалик совғалари билан тақдирланди.