ЎЭП Қашқадарё вилоят кенгаши раиси, халқ депутатлари вилоят Кенгаши депутати Носир Ҳалимов «Яшил макон» умуммиллий лойиҳаси доирасида 2024 йил куз ва 2025 йил баҳор мавсумида экилган кўчатлар парвариши билан танишиш мақсадида Касби туманида бўлди.

Мониторинг жараёнида Экология, атроф-муҳитни муҳофаза қилиш ва иқлим ўзгариши бошқармаси ва унга қарашли корхоналарда, хусусан Касби туман чиқинди полигони атрофида барпо этилган яшил ҳудудлар ҳолати билан танишилди.

«Мустақилобод» маҳалласида жойлашган 5 гектар чиқинди полигонида аҳвол аянчли. Полигонда чиқинди тўкиш, уларни саралаш ва зарарсизлантириш учун шароит йўқ. Техникалар носоз. Полигон қошида ташкил этилган яшил боғда 2024 йилда экилган икки мингта кўчат эса сувсизликдан қуриб кетган. Масъулларнинг айтишича, артезиан қудуғининг носозлиги сабабли кўчатларни суғоришнинг имкони бўлмаган.

Депутат Носир Ҳалимов ушбу ҳолатларни бартараф этиш бўйича тегишли масъуллар билан иш олиб борадиган, депутатлик назоратини ўрнатадиган бўлди.