Олий Мажлис Қонунчилик палатаси депутати Наврўзбек Юсупов Пахтаобод туманидаги 48-оилавий поликлиника фаолияти билан танишар экан, мутасаддилар эътиборига мазкур саволни қўйди.

Тиббий хизмат – инсон ҳаёти ва саломатлигини таъминлашда энг муҳим бўғин ҳисобланади. Мазкур тизимни янгилаш, уни халққа яқин ва самарали қилиш давлат сиёсатининг устувор йўналишларидан биридир. Депутат аҳолига бирламчи тиббий ёрдам кўрсатиш тартиби, унинг ташкилий жиҳатлари ва амалдаги ҳолати юзасидан тиббиёт ходимлари билан суҳбатлашди.

Маълум бўлишича, мазкур поликлиника 14 778 нафар аҳоли, жумладан 3 250 та оилага хизмат кўрсатади. Рақамлаштириш жараёнлари давом эттирилаётган бўлса-да, компьютер жамланмаси етишмаслиги каби инфратузилма муаммолари мавжудлиги қайд этилди.