​Сирдарё туманидаги «Сомон йўли» фермер хўжалигидаги беш гектар ерга барпо қилинган боғни кўриб ҳавасингиз келади. Умуман, туманда боғ яратишни истаган ҳаракатчан, интилувчан ёшлар жуда кўп. Давлатимиз томонидан ҳар томонлама қўллаб-қувватланиши эса уларнинг кучига куч қўшмоқда.

«Сомон йўли» фермер хўжалиги 53 гектар ерда ташкил этилган эди. Уч йил бурун мавжуд майдоннинг 5 гектарида шартнома асосида боғ яратилди. Шартномага мувофиқ ҳар йили водийлик боғбонлар келиб, дарахтларга шакл бериб кетади. Борди-ю, боғдаги мевали дарахтлар касалланса, дориланади. Агар эътибор бериб қаралса, дарахтларнинг жуда тўғри кесилганини пайқаш қийин эмас. Иккинчи йили улар орасига полиз экинлари экилди ва ариқлар дарахтга яқинроқ жойдан олинди. Биласиз, полиз экинлари тез-тез суғориб турилади. Натижада экилган дарахт кўчатлари ҳам бир мавсумнинг ўзида 10-15 марта сув ичди. Учинчи йили орасига беда экилди ва шу пайтга қадар икки марта ўриб олинди. Беда экилган жой тупроғида фосфор моддаси кўп йиғилади ва тупроқ унумдорлигини оширади. Беда келаси йили ҳам қолдирилади. Бироқ тўртинчи йилдан бошлаб боғ ораси бўш қолдирилади. Шунингдек, боғ янаги йили эллик фоиз ҳосилга киради.

Сирдарё туманида боғ яратиш иштиёқи кучли кишилар кўп. «Амир Темур» фермер хўжалиги раҳбари Неъматилло Раҳматуллаев ҳам ана шундай боққа меҳри тушганлардан.

— Аҳолини мева-сабзавот маҳсулотлари билан таъминлаш мақсадида беш гектар ерда интенсив боғ ташкил қилдим, — дейди фермер Неъматилло РАҲМАТУЛЛАЕВ. — Кўчатларни эса олимлар ва мутахассислар билан маслаҳатлашиб, уларнинг тавсияси билан олиб келганман. Шундай қилиб, 2 гектар ерга олма, 2 гектарига шафтоли ва 1 гектар майдонга олхўри кўчати ўтқаздим. Олма ва олхўри бу йил нишона берди. Умуман, туманимиз боғдорчилик учун жуда қулай ҳисобланади. Фақат меҳнат қилиш керак, холос. Боғбон эккан кўчатининг биринчи ҳосилини кўриб, қаттиқ қувонади. Қилган меҳнати самараси унга улкан завқ-шавқ ва шижоат ато этади.

Ботирали ИМОМОВ

тайёрлади.