Муҳиддин КАЛОНОВ, Навоий давлат университети ректори

Бугун барчамиз «Ватан учун, миллат учун, халқ учун!» эзгу шиор остида бирлашиб, энг улуғ ва энг азиз сана – Ўзбекистон Республикаси мустақиллигининг шонли 34 йиллигини катта қувонч ва юксак ғурур билан нишонламоқдамиз. Бу байрам нафақат тарихий сана, балки ҳар биримизнинг қалбимизда ғурур ва ифтихор уйғотадиган, халқимизнинг асрий орзу-интилишлари рўёбини ифодаловчи улуғ айёмдир.

Бугун Президентимиз Шавкат Мирзиёев раҳбарлигида мамлакатимиз Янги Ўзбекистон тараққиёт йўлига дадил қадам қўйди. Давлатимиз сиёсий, иқтисодий ва ижтимоий соҳаларда мислсиз ютуқларга эришмоқда. Мамлакатимизнинг халқаро обрў-эътибори ортиб бормоқда, «Марказий Осиё – умумий уйимиз» тамойили асосида қўшни давлатлар билан дўстона ва ҳамкорлик алоқалари мустаҳкамланмоқда.

Бу ўзгаришларнинг барчаси – мустақиллик йилларида давлатимиз томонидан яратилган имкониятлар ва олиб борилган оқилона сиёсат натижасидир. Мустақиллик йилларида дунёга келган авлод бугун баркамол ёшлар сифатида Ватан тараққиёти учун фидойилик билан хизмат қилмоқда. Президентимизнинг «Ёшлар – бизнинг келажагимиз» деган чақириғи амалий ишларда ўз аксини топмоқда. Ёшларимиз нафақат республика, балки халқаро миқёсдаги илмий танлов ва мусобақаларда ғолиб бўлмоқда. Мана шундай буюк кунларда биз мустақилликни фақат байрам сифатида эмас, балки халқимизнинг абадий қадрияти ва муқаддас бурчи сифатида ҳис этамиз. Мустақилликни асраб-авайлаш, уни янада мустаҳкамлаш – барчамизнинг энг олий вазифамиздир.

Ўтган 34 йил ичида халқимиз машаққатли, аммо шарафли йўлни босиб ўтди. Биргина таълим соҳасини олайлик: юртимизда 220 дан ортиқ олий таълим муассасалари фаолият юритмоқда, улар орасида нуфузли хорижий университетларнинг филиаллари ҳам мавжуд. Мустақилликнинг дастлабки йилларида атиги 28 та олий таълим муассасаси бўлганини ҳисобга олсак, тараққиёт қанчалик кенг қамровли эканини кўриш мумкин.

Мустақиллик бизни эркин фикрлаш, янгиланиш ва тараққиёт сари ундайди. Шу боисдан ҳам барчамиз бир ёқадан бош чиқариб, миллий тараққиётимизга муносиб ҳисса қўшмоғимиз лозим. Юртимизнинг буюк келажаги айнан бугунги меҳнатимиз, фидойилигимиз ва Ватанга садоқатимиз билан белгиланади.