Носир ҲАЛИМОВ, ЎЭП Қашқадарё вилоят кенгаши раиси, халқ депутатлари вилоят кенгаши депутати

Бугунги кунга келиб, атмосфера ҳавосининг ифлосланиши, биологик хилма-хилликнинг камайиши, тупроқ деградацияси дунё миқёсида глобал ташвиш уйғотмоқда. Бу, ўз навбатида табиий ресурсларни тежаш, улардан оқилона фойдаланиш, атроф-муҳитни муҳофаза қилиш ҳамда юзага келаётган экологик муаммоларнинг олдини олишга жиддий эътибор қаратишни талаб этади.

Ўзбекистон Экологик партияси давлатимизнинг айни шу йўналишдаги сиёсати рўёби йўлида фаол ҳаракат қилмоқда. Давлат ва жамият ўртасида муҳим кўприк вазифасини бажармоқда. Партиямизнинг Қашқадарё вилоят, туман ва шаҳар кенгашлари, депутатлар экологик муаммоларга қарши курашиш ғоя ва мақсадларини аҳоли орасида тарғиб қилиш, ҳудудда экологик барқарорликни таъминлаш йўлида иш олиб бормоқда.

Бугун Қашқадарё вилоятида Экологик партия тарафдорлари сони 40 минг нафардан ортган.

Ўтган давр мобайнида партия ғоясини тарғиб қилиш мақсадида вилоятда 250 дан ортиқ тадбирлар ўтказилиб, унда 5 мингдан ортиқ аҳоли қамраб олинди.

Партия депутатлик гуруҳи ҳамда халқ депутатлари вилоят Кенгаши ҳузуридаги «Аграр, сув хўжалиги ва экология масалалари бўйича» доимий комиссияси ҳамкорлигида мониторинг ишлари ўтказиб келинмоқда. Мониторинг натижасида 10 дан ортиқ жамоатчилик эшитувлари ўтказилди. Жумладан, вилоятда маиший чиқиндиларни жойлаштириш, сақлаш, утилизация қилиш, зарарсизлантириш хизматининг ташкил этилиши ва ҳудудлардаги чиқинди полигонларининг ҳолатини ўрганиш, чиқиндиларни бошқариш, циркуляр иқтисодиётни ривожлантириш борасида вилоятда амалга оширилаётган ишлар, мавжуд муаммолар ва келгусидаги устувор вазифалар ҳамда «Яшил макон» умуммиллий лойиҳаси доирасида 2025 йил баҳор мавсумида экилган мевали ва манзарали дарахт кўчатларининг ҳолати юзасидан мутасаддилар ахбороти тингланди. Тегишли ташкилотлар томонидан йўл қўйилган камчиликлар муҳокама қилинди. Масъулларга тегишли кўрсатмалар берилди.

Воҳамизни яшил маконга айлантириш, экологик барқарорликни таъминлаш мақсадида давом эттирилаётган «Яшил макон» умуммиллий лойиҳаси доирасидаги ишларда партия фаоллари мунтазам иштирок этиб келмоқда.

«Яшил макон» умуммиллий лойиҳаси доирасида жорий йилнинг баҳорги мавсуми давомида 10,1 млн кўчат экиш режалаштирилган бўлса, амалда 11,2 млн кўчат ерга қадалди. Лойиҳа доирасида манзилли дастур ишлаб чиқилиб, баҳорги мавсум давомида вилоятдаги йирик саноат корхоналари ва қурилиш материаллари ишлаб чиқариш корхоналари томонидан 541 минг 65 туп дарахт кўчатлар экилди. Корхоналар томонидан 5 гектардан «яшил белбоғ»лар ташкил этилди.

Партия фаоллари томонидан ҳудудлардаги экологик муаммоларга ечим топиш, аҳоли саломатлигини сақлаш ҳамда халқ фаровонлиги йўлида жамоатчилик назорати ўрнатилиб, муаммоларни ҳал этиш масалалари кўрилмоқда. Хусусан, 21 йилдан буён атроф-муҳитга, аҳоли саломатлигига салбий таъсир кўрсатиб келаётган экологик муаммо Олий Мажлис Қонунчилик палатасидаги партиямиз фракцияси аъзолари ҳамда халқ депутатлари вилоят Кенгаши депутатлик гуруҳи иштирокида ўрганилди.

Депутатлик сўровидан сўнг 1979 йилда фойдаланишга топширилган, эскириб, қарийб яроқсиз аҳволга келган оқава сув иншооти ҳозирда бутунлай янгиланмоқда. Эрон ва Туркия­нинг тажрибали мутахассислари томонидан амалга оширилаётган янги лойиҳа 2027 йилда якунланиши кўзда тутилган. Ушбу оқава сув тозалаш иншооти тўлиқ ишга тушса, Қарши шаҳридаги 59 та маҳалла аҳолиси марказлашган оқава сув хизматлари билан тўлиқ қамраб олинади.

Олиб борилаётган бу каби амалий ишлар аҳолининг қулай табиий муҳитда ҳаёт кечириши учун барча зарур шарт-шароитларни яратишга, табиий ресурслардан оқилона ва самарали фойдаланишга ҳамда экологик хавфсизлик муаммоларнинг олдини олишга хизмат қилади.