Камол ЖУМАНИЁЗОВ, ЎЭП Хоразм вилоят кенгаши раиси

Мустақиллик йилларида мамлакатимизда ҳар бир соҳада чуқур ислоҳотлар амалга оширилиб, халқимизнинг ҳаёт даражасини юксалтириш, инсон манфаатлари, саломатлиги ва фаровонлигини таъминлаш давлат сиёсатининг устувор йўналишига айланди. Айниқса, атроф-муҳит муҳофазаси, экологик хавфсизлик ва барқарор ривожланиш масалалари кун тартибининг энг муҳим мавзуларидан бири сифатида эътиборга олинмоқда.

Ўзбекистон Экологик партияси мустақиллик даврида вужудга келган ва бугунги кунда мамлакатимизда экологик маданиятни юксалтириш, яшил иқтисодиётни ривожлантириш, қонунчилик ташаббуслари орқали атроф-муҳитни муҳофаза қилиш, аҳолининг экологик ҳуқуқий онги ва фаоллигини ошириш йўлида фаол ҳаракат қилмоқда.

Сўнгги йилларда экологик вазиятни янада барқарорлаштириш бўйича салмоқли ишлар амалга оширилмоқда. Хусусан, экологик тарғибот ва маърифат ишлари тизимли йўлга қўйилди. Аҳолининг барча қатламлари ўртасида мунтазам равишда экологик акциялар, талаба-ёшлар иштирокида «Яшил мактаб» лойиҳалари ўтказилмоқда. Ҳудуддаги чиқиндиларни тўплаш ва қайта ишлаш тизимини такомиллаштириш, аҳолининг тоза ичимлик сув билан таъминланишига оид мониторинглар олиб борилмоқда.

«Яшил макон» умуммиллий ҳаракати доирасида миллионлаб дарахт кўчатлари экилди, экологик инфратузилмани яхшилаш ишлари амалга оширилди. Иқлим ўзгаришига мослашиш ва экологик хавфсизликни ошириш борасида экологик дастурлар ишлаб чиқилиб, амалга оширилмоқда.

Бу каби ютуқлар – халқимизнинг экологик жиҳатдан соғлом ҳаёт кечиришига, келгуси авлодларга тоза ва мусаффо табиатни мерос қолдиришга қаратилган эзгу саъй-ҳаракатларимиз самараси, десак муболаға бўлмайди.

Юртимиз тинч, осмонимиз мусаффо, халқимиз фаровон бўлиши йўлида биргаликда ҳаракат қилишдан, Ватанимиз равнақи ва барқарор ривожланишига муносиб ҳисса қўшишдан ҳеч қачон чарчамаймиз.