Миллий ҳунармандчилигимиз ҳақида гап кетганда, каштачиликни алоҳида ­эътироф этиш жоиз.

Бугунги кунда чеварларимиз томонидан тикилаётган миллий каштачилик намуналари либосларда, уй жиҳозларида намоён бўлмоқда. Ўз ҳунари ортидан яхшигина даромад топаётганлар ҳам кўпчиликни ташкил этади.

Китоблик чевар Нодира Жумаева тикаётган маҳсулотлари ўзимизнинг бозорларда анча харидоргир. Шунингдек, миллий каштачилик асосида безатилган либослар, сумкачалар, бош кийим ва рўмоллар юртимизга ташриф буюрган чет элликларнинг ҳам эътиборини тортмоқда.

Нодира 2007 йилдан бошлаб миллий каштачилик ва попурчилик йўналишида тадбиркорлик фаолиятини йўлга қўйди. Тадбиркор сифатида ҳозирга қадар 20 га яқин ёшни иш билан таъминлаган, 30 дан ортиқ шогирд чиқарди. Цехда бугун 20 турга яқин маҳсулот ишлаб чиқарилмоқда. Қизлар тикаётган сўзана, дўппи, аёллар ва болалар сумкалари, ёстиқлар, қизлар учун либослар, эркаклар костюмлари ўзининг бежиримлиги билан ажралиб туради.

— Тикаётган маҳсулотларимизни асосан саёҳатчилар кўп ташриф буюрадиган масканларга, савдо уйларига топширамиз, — дейди тадбиркор Нодира ЖУМАЕВА. — Бозорлар ва аҳоли учун ҳам буюртма асосида маҳсулот етказиб беряпмиз. Кашталаримизда турли гуллар акс этган: қалампир, бодом, анор, қуёш, чархпалак ва ҳоказо. Попурчиликда эса асосан, занжир чокдан фойдаланамиз. Маҳсулотларим билан турли халқаро кўргазмалар, танловларда қатнашиб, юқори ўринларни қўлга киритаётганим истиқлолнинг менга берган имкониятлари туфайли деб биламан.

Нодира «Қўли гулдир ўзбек аёлин», «Дўппи тикдим ипаклари тиллодан…», «Ватаним тараққиётига менинг ҳиссам», «Мустақил юрт ҳунармандлари» каби кўплаб республика миқёсдаги танлов, кўргазмаларда қатнашиб, юқори натижаларга эришди. Шунингдек, у «Менинг бизнес ғоям» танловида ғолиб бўлиб, 10 миллион сўмлик имтиёзли кредитни қўлга киритди. Унга иккита тикув машинаси ва хомашё маҳсулотларини сотиб олди. Келгусида ёш тадбиркор ўз фаолиятини янада кенгайтириш ниятида.

Соҳиба СУЮНОВА