Тошкентда босқичма-босқич пойтахт ташқарисига кўчирилиши керак бўлган экологик хавфли ва энергия талаб қиладиган ишлаб чиқариш корхоналари рўйхати белгиланди. Рўйхатга 87 та шундай корхона киритилган, дея хабар берди Экология ва иқлим ўзгариши миллий қўмитаси.

Аввалроқ, ўтган йилнинг май ойидан бошлаб Тошкент, Нукус ва вилоят марказларида асбест ва цемент, шлам ва шлаклар ишлаб чиқариш, терини ошлаш, паррандачилик фабрикалари, юқори самарали чанг ва газ тозалаш қурилмалари билан жиҳозланмасдан ҳар қандай турдаги кўмирни ёқиш, қора ва рангли металлургия заводлари, таркибида заҳарли аралашмалар бўлган шиша билан ишлаш, заҳарли кимёвий моддалар билан ишлаш, хавфлилик даражаси бўйича I ва II синфга мансуб чиқиндиларни қайта ишлаш ва ёқиш корхоналари каби йўналишлар бўйича янги лойиҳаларни амалга ошириш тақиқланган эди.

Пойтахтда ҳаво сифатини яхшилаш бўйича махсус комиссиянинг хабар беришича, Янгиҳаёт туманидаги саноат зонасида жойлашган ҳамда иккиламчи рангли металларни тайёрлаш, қайта ишлаш ва ишлаб чиқаришга ихтисос­лашган «Ўзиккиламчиранглиметалл» корхонаси ана шундай корхоналарнинг биринчиларидан бўлади.

Завод экологик хавфлилик бўйича I тоифадаги объектлар сирасига киради. У Жиззах вилоятидаги эркин иқтисодий зонага кўчирилади.

Октябрь ойида корхонага ижро этилиши мажбурий бўлган кўрсатма берилди ва экологик зарар етказгани учун 18 миллиард сўмдан ортиқ миқдорда компенсация ҳисобланган. Компенсация тўловлари бўйича берилган имтиёзлар ҳисобига эскирган (1970 йиллардаги) ва экологик жиҳатдан зарарли бўлган эритиш печлари утилизация қилинади ҳамда корхона ўз фаолиятини «замонавий экологик талаб­ларга тўлиқ жавоб берадиган, технологик жиҳатдан мукаммалроқ ускуналарда» давом эттиради.

Фақатгина ушбу корхонанинг кўчирилиши билан атмосферага йилига ўртача 226,7 тоннага яқин ифлослантирувчи моддалар чиқарилишининг олди олиниши кутилмоқда, деб қайд этди қўмита.