Инсон қадри устувор бўлган жамиятда кичик бир мурожаат ҳам эътибордан четда қолмайди. Зеро, аҳолининг осойишта ҳаёти ва хавфсизлигини таъминлаш халқ вакилларининг кундалик фаолиятидаги энг муҳим вазифалардан биридир.

Ана шундай масъулият билан Бухоро шаҳридаги «Шодлик» маҳалласи аҳолиси томонидан кўтарилган долзарб масалага ижобий ечим топилди.

Гап шундаки, маҳалла ҳудудидаги кўп қаватли уйлар атрофида ўсиб турган айрим дарахтларнинг шохлари хонадонлар деразаларига яқинлашиб кетгани фуқаролар учун ноқулайлик туғдираётган эди. Айниқса, кучли шамол пайтида бу ҳолат электр тармоқлари ва уй деворларига шикаст етказиши, аҳоли хавфсизлигига таҳдид солиши мумкинлиги аниқланди.

Мазкур муаммо халқ депутатлари Бухоро шаҳар Кенгаши депутати Дилором Муҳаммадиеванинг бевосита аралашуви ва ташаббуси билан қисқа муддатда ҳал этилди. Энг муҳими, жараён давомида дарахтларга ҳеч қандай зарар етказмаган ҳолда, экологик талаблар ва агротехник қоидаларга қатъий риоя қилинди. Тегишли хизмат вакиллари томонидан дарахт­ларнинг ортиқча ва хавф туғдираётган шохлари санитар тартибга келтирилди.

Натижада «Шодлик» маҳалласи аҳлининг мурожаати қаноатлантирилиб, ҳудудда фуқаролар учун хавфсиз ва қулай муҳит яратилди. Бу каби тадбирлар халқ вакилларининг сайловчилар билан доимий мулоқотда экани ҳамда ҳар бир муаммога инсон манфаати нуқтаи назаридан ёндашилаётганининг амалий ифодасидир.