​Давлат ҳокимияти органларида фаолият юритувчи раҳбар ходимларга фуқароларнинг мурожаатлари ва муаммолари устида жиддий шуғулланиш вазифаси юклатилди.

Бу ҳукуматимизнинг «Жисмоний ва юридик шахсларнинг мурожаатлари тўғрисида»ги Қонун талабларидан келиб чиқиб, 2016 йил 27 октябрида қабул қилинган қарори билан белгиланди. Унга кўра, Қорақалпоғистон Республикаси Вазирлар Кенгаши, вилоят, шаҳар ва туман ҳокимликлари аҳоли ва тадбиркорлар учун кунлик соат 08:00 дан 11:00 гача шахсий қабулларни ташкил қилиш чораларини кўриш лозим. Улар зиммасига, шунингдек, жойларда аҳоли ва тадбиркорлик субъектлари билан ишлашни тубдан қайта кўриб чиқиш, муаммолар ва эътирозларни жойида ҳал этиш, веб-сайтлари ва ишонч телефонлари орқали мурожаат қилиш тизимини тубдан яхшилаш каби вазифалар юклатилган.