Маҳалла нафақат маъмурий бирлик, балки халқнинг дарди тингланадиган, ислоҳотларнинг амалий натижаси кўринадиган энг муҳим бўғиндир.

«Маҳаллани ривожлантириш ва жамиятни юксалтириш йили» Давлат дастури доирасида жойларда олиб борилаётган ўрганишлар эса мавжуд имкониятларни тўлиқ сафарбар этишга хизмат қилмоқда.

Олий Мажлис Қонунчилик палатаси депутати Моҳира Ходжаева Бўстонлиқ туманидаги «Бўстон» маҳалла фуқаролар йиғинида бўлиб, ҳудуднинг ижтимоий қиёфаси ва аҳоли яшаш шароитларини яқиндан ўрганди. Маҳалла фаоллари билан кечган қизғин мулоқотда Давлат дастури ижросининг бориши ва «маҳалла еттилиги»нинг ҳамкорликдаги фаолияти таҳлил қилинди.

Ўрганишлар давомида депутат асосий эътиборни оилаларни камбағалликдан чиқариш ва ижтимоий ҳимояга муҳтож қатламни қўллаб-қувватлашнинг янги механизмларига қаратди. Хусусан, тадбиркорликка йўналтириш орқали даромад манбаини яратиш бўйича зарур тавсиялар берилди.

– Биз учун ҳар бир хонадоннинг ижтимоий ҳолати, ҳар бир фуқаронинг муаммоси муҳим. Маҳалла тизимини самарали ташкил этиш дегани – бу шунчаки ҳисобот бериш эмас, балки одамларнинг ҳаётида ижобий ўзгариш ясаш демак. Агар маҳалла фаоллари ҳар бир оила билан тизимли ишласа, камбағалликни қисқартириш ва ижтимоий адолатни таъминлашга тезроқ эришамиз, – дея таъкидлади депутат Моҳира Ходжаева.