Аҳоли билан тўғридан-тўғри мулоқот қилиш, одамларни қийнаётган масалаларни жойида ўрганиш ва уларга ҳуқуқий ечим топиш – халқ вакиллари фаолиятининг бош мезони.

Маҳаллабай тизим асосида ўтказилаётган учрашувлар ҳудудлардаги ижтимоий-иқтисодий муҳитни соғломлаштиришга хизмат қилмоқда.

Миробод туманидаги «Янги Қўйлиқ» маҳалласида Олий Мажлис Қонунчилик палатаси депутати Борий Алихонов ва Тошкент шаҳар Кенгаши депутати Севара Файзиева иштирокида навбатдаги сайёр қабул ўтказилди. Маҳалла фаоллари, нуронийлар ва мутасадди ташкилот вакиллари қатнашган ушбу мулоқотда ҳудуддаги долзарб масалалар муҳокама марказида бўлди.

Фуқаролар томонидан маҳалла инфратузилмасини яхшилаш, хусусан, ички йўлларни таъмирлаш ва ирригация-суғориш тизимларини тартибга солиш бўйича қатор мурожаатлар билдирилди. Шунингдек, ҳудудда жамоат хавфсизлигини кучайтириш ҳамда фуқароларни рўйхатга қўйиш билан боғлиқ ҳуқуқий масалалар юзасидан ҳам аниқ таклифлар ўртага ташланди.

Депутатлар ҳар бир мурожаатни диққат билан тинглаб, уларнинг ечими бўйича мутасаддилар билан боғланишди. Ҳар бир мурожаат ижросини якунига етказиш ва одамларнинг ҳаётида ижобий ўзгаришлар юз беришини таъминлашга киришилди.