Сув ресурсларининг тақчиллиги кузатилаётган бугунги даврда ҳар бир томчи обиҳаётдан оқилона фойдаланиш ҳаётий заруратдир.

Айниқса, табиий ёғингарчилик сувларини йиғиш ва ундан деҳқончиликда фойдаланиш борасидаги халқона тажрибаларни илмий ва амалий жиҳатдан қўллаб-қувватлаш экологик барқарорликни таъминлашда муҳим аҳамиятга эга.

Олий Мажлис Қонунчилик палатасидаги Экологик партия фракцияси раҳбари Абдушукур Ҳамзаев Қашқадарё вилояти Деҳқонобод туманида маҳаллий аҳолининг ёмғир сувидан фойдаланиб, сувсиз ҳудудларда дарахт ва доривор каврак ўсимлигини етиштириш борасидаги ноёб тажрибасини ўрганди. Қодир бахши Раҳимов номли маҳалланинг «Қуридаҳна» қишлоғи хонадонларида сув йиғиш тизимлари ва ундан суғоришда фойдаланиш жараёнлари билан яқиндан танишди.

«Деҳқонободлик юртдошларимизнинг ёмғир сувини қадрлаб, ундан унумли фойдаланаётгани – бу ҳақиқий экологик масъулият намунаси. Биз ёмғир ва қор сувларини исроф қилмай, уларни махсус резервуарларда жамлашни ва мана шундай «яшил воҳа»лар яратишни бутун мамлакат бўйлаб тарғиб қилишимиз керак. Бу нафақат табиатни асраш, балки аҳоли даромадини оширишнинг ҳам самарали йўлидир», – дея таъкидлади Абдушукур Ҳамзаев.