Халқ билан мулоқот қилиш, аҳолини қийнаётган муаммоларни жойида ўрганиб, уларга амалий ечим топиш бугунги кун депутатларининг бош мезонига айланган. Бу борада Ўзбекис­тон Экологик партияси вакиллари ҳам фаоллик кўрсатиб, фуқароларнинг ҳуқуқ ва манфаатларини ҳимоя қилишда ташаббус кўрсатмоқда.

Халқ депутатлари Тошкент шаҳар Кенгаши депутати Мирзағолиб Тиллашайховнинг Яшнобод туманидаги «Мухтор Ашрафий» маҳалла фуқаролар йиғинида ўтказган сайёр қабули давомида фуқаролар томонидан муҳим масала кўтарилди. Мурожаатда маҳалла ҳудудидаги болалар спорт майдончасида хавфсизлик қоидалари бузилаётгани баён этилган.

Мазкур мурожаат асосида Ўзбекистон Экологик партияси Тошкент шаҳар Кенгаши вакиллари ҳамда маҳалла фаоллари иштирокида жойида ўрганиш ишлари олиб борилди. Натижада болалар спорт майдончаси ҳудудида фуқаро томонидан ноқонуний равишда автомобилларни электр қувватлаш ускунаси ўрнатилгани аниқланди. Ушбу ҳолат майдончада шуғулланаётган ва дам олаётган болаларнинг ҳаёти ҳамда саломатлиги учун жиддий хавф туғдираётгани қайд этилди.

Депутатлик назорати ва соҳа мутахассисларининг саъй-ҳаракати билан мазкур ҳолат юзасидан шу куннинг ўзида масъулларга тегишли кўрсатмалар берилди. Натижада ноқонуний ўрнатилган қурилма олиб ташланиб, мавжуд муаммо жойида бартараф этилди ва ҳудудда хавфсиз муҳит қайта тикланди.