Сиёсий фаолиятда энг юксак мукофот бу халқнинг ишончи ва кўрсатилган хизматларнинг жамият томонидан эътироф этилишидир. Депутатлик масъулияти нафақат қонун ижодкорлиги, балки ҳудуднинг ижтимоий ва экологик қиёфасини ўзгартиришда шахсий намуна бўлишни англатади.

Ўзбекистон Экологик партияси Термиз туман кенгаши раиси, халқ депутатлари туман Кенгаши депутати Шафоат Норсаевнинг «Меҳнаткаш депутат» номинацияси ғолиби деб топилиши унинг йиллар давомидаги фидокорона меҳнатининг мантиқий натижаси бўлди. Шафоат Норсаев нафақат сайловчиларнинг кундалик муаммоларини ҳал этишда, балки ҳудудда экологик барқарорликни таъминлашда ҳам етакчилик қилмоқда. Унинг ташаббуси билан «Яшил макон» лойиҳаси доирасида минглаб кўчатлар экилиб, янги боғлар барпо этилди. Аҳоли, айниқса ёшлар ва аёллар ўртасида экологик маданиятни юксалтириш борасидаги тизимли ишлари туманнинг ижтимоий қиёфасини яхшилашга хизмат қилди. Ушбу мукофот халқ дарди билан яшаётган ва табиатни асраш йўлида тиним билмаётган ҳақиқий фидойи инсонга берилган муносиб баҳодир.