Инсон қадрини улуғлаш, айниқса, умрининг ҳар бир йилини меҳнатга, Ватан равнақига ва оила мустаҳкамлигига бағишлаган кексаларимизни эъзозлаш – биз учун нафақат анъана, балки муқаддас бурч. Аср билан юзлашган инсонларнинг хотиралари эса тарихнинг тирик саҳифаларидир.

Ўзбекистон Экологик партияси Марказий Кенгаши раисининг ўринбосари Нилуфар Маткаримова бошчилигидаги бир гуруҳ партиядошлар Самарқанд вилоятининг файзли гўшаларидан бирида истиқомат қилувчи 100 ёшли Маҳбуба она Рустамова хонадонида бўлишди. Суҳбат асносида Маҳбуба она Иккинчи жаҳон уруши даврининг оғир синовлари, урушдан кейинги тикланиш йилларидаги заҳматли меҳнатлари ҳақида сўзлаб берди. Онахоннинг ҳар бир сўзида бугунги тинч ва обод кунларнинг қадрига етиш, табиатни ва инсонийликни асраш кераклиги ҳақида теран маъно бор эди. Президентимиз томонидан фахрийларга кўрсатилаётган юксак эътибордан мамнун бўлган онахон, юрт тинчлиги ва атроф-муҳит мусаффолиги йўлида хизмат қилаётган партия фаолларига оқ фотиҳа берди. Бундай зиёратлар авлодлар ўртасидаги маънавий ришталарни мустаҳкамлашга хизмат қилади.