Миришкор туманида «Яшил макон» умуммиллий лойиҳаси доирасида амалга оширилаётган тадбирлар ҳамда ўсимлик дунёсини муҳофаза қилиш юзасидан кенг қамровли жамоатчилик назорати тадбирлари ўтказилди.

Ушбу жамоатчилик мониторингида ЎЭП Қашқадарё вилоят кенгаши раиси, халқ депутатлари вилоят Кенгаши депутати Носир Ҳалимов, партия фаоллари, вилоят Экология ва иқлим ўзгариши бош бошқармаси туман бўлими ходимлари, «Миришкор Қоракўлчилик, наслчилик» кластери раҳбари, вилоят Кенгаши депутати Неъмат Жумақулов ҳамда халқ депутатлари туман Кенгаши котибияти мудири Азамат Ҳамраев иштирок этишди.

Тумандаги «Бўстон» маҳалласи ҳудудида олиб борилаётган ишларга алоҳида эътибор қаратилди. Маълум бўлишича, ушбу ҳудуддаги 2000 гектардан зиёд улкан майдонда «Қизил китоб»га киритилган, табиат учун ниҳоятда муҳим бўлган 14 турдаги ноёб ўсимликлар уруғлари экилган. Жумладан, чўл иқлимига мос ва тупроқни емирилишдан асровчи саксовул, қараған, черкес, илоқ, изен, коврак ва чуған каби ноёб флора вакилларини кўпайтириш бўйича тизимли ишлар олиб борилмоқда. Депутатлар ва соҳа мутахассислари томонидан ушбу яшил майдонларни парвариш қилиш, асраб-авайлаш ҳамда ҳудуднинг экологик мувозанатини тиклаш бўйича зарур чора-тадбирлар ва тегишли тавсиялар белгилаб олинди.