Олий Мажлис Қонунчилик палатаси депутати, Ўзбекистон Экологик партияси фракцияси аъзоси Хайрулло Гаппоров Наманган давлат техника университетининг сунъий интеллект лабораторияси фаолияти билан яқиндан танишди.

Мазкур замонавий марказда талабаларнинг амалий билимларини мустаҳкамлаш ва илмий салоҳиятни ошириш учун кенг шароитлар яратилган бўлиб, умумий ҳисобда тўққизта махсус ақлли хона, стартап акселератор ҳамда робототехника ва бионика марказлари ташкил этилган. Ушбу марказ сунъий интеллект, транспорт, экология ва агротехнологиялар йўналишида инновацион лойиҳаларни ҳаётга татбиқ этмоқда.

Фарғона вилоятида илм-фан ва ишлаб чиқаришни бирлаштирувчи йирик лойиҳа ҳисобланган Аироинжинеринг технопарки қурилиши жадал суръатларда давом этмоқда. Лойиҳа жараёнлари билан танишиш мақсадида вилоят ҳокими Хайрулло Бозаров ва вилоят прокурори Бахтиёр Исмоилов ҳамда Экопартия вилоят кенгаши раиси Рустамбек Тожиев Фарғона давлат техника университетида бўлишди. Технопарк қишлоқ хўжалигида сув ва ресурслардан самарали фойдаланиш, экинлар мониторинги ва ақлли бошқарув тизимларини жорий этиш каби муҳим вазифаларга хизмат қилувчи инновацион марказга айланади.