китоблик ёш тадбиркорларнинг ютуқлари

Бугун қайси туман ёки чекка қишлоққа борманг, ҳамма ёшларнинг ишбилармон бўлиб бораётгани-ю, эришаётган ютуқларини фахр билан тилга олади. Китоб туманида ҳам ана шундай ишбилармон, тадбирли ёшлар кўп.

— Мамлакатимизда спортга алоҳида эътибор қаратилмоқда, — дейди китоблик ёш тадбиркор Нодир ЖУМАЕВ. — Бу эса, ўз навбатида, спорт анжомларига бўлган талабни оширади. Шуни ҳисобга олиб, оилавий тадбиркорлигимизни спорт анжомларини ишлаб чиқаришга йўналтирдик.  Кўп ўтмай, биз ишлаб чиқарган маҳсулотлар: спорт қўлқоплари, бокс қопи, кураш гиламлари яхши сотилиб, тузук даромад келтира бошлади. Натижада ўз-ўзидан фаолиятимизни янада кенгайтиришга зарурат туғилди. Энди олдингидан ҳам кўпроқ маҳсулот ишлаб чиқариш ҳақида ўйлаяпмиз.

Нодир бу йил «Ёш тадбиркор — юртга мададкор» танловининг Қашқадарё вилояти босқичида ғолиб бўлиб, республика босқичига чиқди. Танлов шартига кўра, ғолиб тижорат банклари томонидан имтиёзли асосда кредит олиш ҳуқуқини қўлга киритади. У банкдан олмоқчи бўлган 30 миллион сўмлик имтиёзли кредит эвазига ўзининг якка тартибдаги тадбиркорлик фаолиятини бошлаш учун яна бир нечта тикув машиналари сотиб олмоқчи.

Бу каби серғайрат, изланувчан, ишбилармон ёшлар кўпаяётгани сабаб, миллий ҳунармандчилик турлари ҳам кун сайин ривожланмоқда. Айниқса, ёғоч билан ишланадиган ҳунармандчилик турларига эҳтиёж катта. Шундай ҳунармандларимиздан бири — Сарвар. Ёш бўлишига қарамай, тумандаги моҳир усталардан ҳисобланади. Унинг цехида ясалаётган маҳсулотлар харидоргир.

— Цехимизда ўнга яқин турда мебель ишлаб чиқаряпмиз, — дейди ёш тадбиркор Сарвар ЖОНҚОБИЛОВ. — Маҳсулотимизда ўзига хос услубни яратиш ва харидорларга дид билан безатилган буюмларни етказиб бериш муҳим аҳамиятга эга. Негаки, рақобат анчагина кучли. Замонавий жиҳозларга миллий шаклларни уйғунлаштириб, ўзгача услубда маҳсулот яратишга ҳаракат қиламан. Яқинда ҳам шкаф, ҳам дарсхона вазифасини ўтовчи болалар мебелини ясагандим, харидорларга маъқул тушди. Шунга ўхшаш ҳар томонлама қулай янги турдаги маҳсулотлар яратиш устида изланяпман. Ҳозир цехда икки нафар ишчи ишлаяпти. Келгусида фаолиятимни янада кенгайтирмоқчиман.

Ҳа, Нодир ва Сарвар каби тадбирли, ғайрат-шижоатли ёшлар сафининг кенгайиши мамлакатимиз иқтисодиётини кўтаришга, дастурхонимиз тўкин-сочин бўлишига хизмат қилади. Бунинг учун эса барча шарт-шароит етарли ва имкониятлар эшиги кенг очилган.

Соҳиба СУЮНОВА