Жўрабойнинг тўйи бошланиши арафасида муаммо пайдо бўлди. Қанақа дейсизми? Тўйга қайси қўшиқчини таклиф қилиш масаласи. Буни ҳал қилиш учун тоға-ю аммалари, оға-инилари кенгаш ўтказиш учун куёвнинг уйига йиғилишди.

— Қани менга айтинг-чи, тўйга қайси артистни чақирганимиз маъқул? — дея гап бошлади Жумрат тоға.

— Куёв тўрага Тошкентдан Гулёра хонишни келтириб бериш керак эмиш, —  деди куёвнинг отаси Жамшид ака.

— Гулёра хониш ким? — сўради Жумрат тоға чой ҳўплаётиб.

— Анаву бор-у «Бай-бай» деб қўшиқ айтадиган…

— Тошкентдан ўзи келарканми? Ким билади «ставка»си қанча. Машинани сотсак бўлар?

— Нима, ўзимизда камми? Дарахтни силкитсанг, қўшиқчи ёғилади. Телевизорга қара, оламни қўшиқчи босгандай. Буларнинг ҳеч бири айвонингга қош бўлолмайди. Ота-онанинг гапига ҳам қулоқ солиш керак, бўтам.

— Гулёра бўлмаса, Куйчи ошиқни келтириб берасанлар, деб оёқ тираб олган, — деди онаси Фотима хола.

— Куйчи ошиқ қанчага келишини биласизми ўзи? — Жумрат тоғанинг энсаси қотди. — Қалин пули билан баробар. Кўрпангга қараб оёқ узат!

Кейин Жамшид акага қараб қўшиб қўйди:

— Ўғлингни оғзига қараб ўтирма! Бундайроғ, ставкаси пастроқ қўшиқчидан топ. Қиз танлашдаги азоби ҳам етади.

— Майнахонни олиб келсак, қандай бўларкан? — бу гал аммаси Сурмахон баҳсга қўшилди.

— Гармончи халфани айтяпсанми? Бўлмайди.

— Ҳозир у гармонини отиб юбориб, эстрадний бўлиб кетган. Эшитганмисиз, «Қизаравераман-қизаравераман»ни.

— Қизариб юраверсин. Бўлмайди дедимми, бўлмайди!

— Унда Булбулбоевни айтсак, — деди куёвнинг укаси Суҳроб.

— Эй, қўйсанг-чи, — Жамшид ака қошини чимирди. — Осмон бўйи сакраб, хит қилиб юборади.

— Хониш хиргойи-чи? — Гапга қўшилди акаси Тўлқинбой.

— Йўқ! — деди Жумрат тоға. —Тўйдан кейин яна пул сўрайди. Ана, Карим аканинг тўйида қистир-қистир бўлмади, деб яна пул сўраган. Оқсоқол:  «Рухсатномангни кўрсат!»  деган экан жуфтакни ростлаб қопди.

— Бўлмаса, қизиқ-қизиқ қўшиқларни айтади-ку… Ҳа... тилимни учида турувди-я, нимайди…

— Қўшиғини айтинг, кимлигини айтаман, — деди куёв.

— «Денгизга қара, осмонга қара, юлдузга қара…»

— Сайроқбоев! Шуни келтирсак ҳам бўлади.

— Унга пулинг етмайди, — деди Жумрат тоға. — Ставкаси «Куйчи ошиқ»никидан ҳам ошиб кетган.

— Унда «бир ёмон бўлиб кетаман»ни айтган ким эди?

— Шамшир Куйларов! Ҳозир у Америкада, — гапга қўшилди укаси Суҳроб.

— Таннозхон-чи? Халфанинг қизи.

— Бўлмайди, тўйни эркак ашулачи ўтказгани маъқул. Гулзод Шариповни айтамиз.

— Асло! — ўрнидан туриб кетди куёв. — Насиҳат қўшиқларини айтавериб хит қилиб юборади. Ундай қўшиққа ўйингга тушиб бўладими ахир?

— Эй, менга қара, — муҳим гапни айтмоқчидай ўсмоқчилади Жумрат тоға. — Ахир, каттанинг ўғли қўшиқчи-ку. Айтмасак, хўжайининг тўйга келмай қолиши мумкин.

— Рост! — деди Жамшид ака бошлиғи эсидан чиққанидан афсусланиб. — Бу ёғини ўйламабмиз.

— Менга Дўрилдибой Бўкирдиевнинг кераги йўқ, — деди куёв астойдил. — Агар тўйга айтсанглар, мен уйланмайман!..

Тўйга ҳамма нарса тайёр бўлса-да, қўшиқчи маълум бўлмади. Ахир, тўй кунини хонандалар белгилайди-да. Яқин кунларда Жўрабойнинг тўйи бўлиши аниқ. Бироқ қайси қўшиқчи келиши ҳамон номаълумлигича қолмоқда…

Барди ЖУМАНИЁЗОВ