Баҳор – байрамлар фасли. Мудроқ қишдан чиққан бутун борлиқ, бутун тириклик ўзгача интиқлик, ёқимли ҳислар билан кутиб олади баҳорни.

Яратувчанлик, ижодкорлик кайфияти ошади. Барчага яхшилик қилгиси, кўнгилларни кўтаргиси, боғлар яратгиси, гуллар эккиси келади одамнинг. Айниқса, унинг аёллар байрами билан бошланиши кайфиятларни янада юқори даражага кўтариб юборади. Чунки аёл ҳам асли яратувчи, тарбиячи, у ҳам баҳордек гўзал.

Ўзбекистон Экологик партияси Ғузор туман кенгаши раиси Тўлқин Алманов ташаббуси билан тумандаги 29-сон мактабгача таълим ташкилотида аёллар байрами муносабати билан «Хотин-қизларни эъзоз­лаш ҳафталиги» доирасида байрам тадбири ҳамда сумалак сайли ўтказилди.

Сумалак сайлида партия фаоллари, мактабгача таълим ташкилоти ишчи-ходимлари, депутатлар иштирок этишди. Тадбир давомида халқона қадриятларимиз жонланди. Тансиқ таомни пишириш жараёнида партия мақсад ва вазифалари ҳақида сўз юритилиб, ҳамкорликда ўтказиладиган галдаги тадбирлар ҳақида келишиб олинди.

– Сумалак Наврўзнинг шоҳ таоми ҳисоб­ланади, – дейди 29-сон мактабгача таълим ташкилоти мудираси Дилдорахон Аҳмедова. – Маълумотларга кўра сумалакнинг тарихи 3000 йилдан ошиқ бўлиб, баҳор пайтида, Наврўзнинг бошланишида тайёрланиб келинади. Амир Темур даврига оид тарихий, адабий манбаларда ҳам сумалак сайли билан боғлиқ анъаналар Наврўз байрамининг таркибий қисмларидан бири сифатида келиши урғуланади. Бундай сайллар қир-адирларда, боғларда, шаҳарларнинг катта майдонларида, регис­тонларда, чорсу ва расталарда, муқаддас қадамжоларда, маҳалла, гузарларда ўтказилиб, бир ҳафтадан бир ойгача давом этган. Бутун маҳалла иштирокида тайёрланган сумалак кўпчиликка улашиб чиқилган. Одамлар сумалакни татиб кўриш асносида, баҳорга етганига шукрона келтириб, йилнинг яхши, хайрли, баракали келишини тилаб дуолар қилишган. Сумалак сайли, турли томоша базмлар, куй-қўшиқларга уланиб кетган.

Тадбир якунида «Яшил йиллик» умуммиллий лойиҳаси доирасида болалар боғчаси ҳудудига турли мевали ва манзарали дарахт кўчатлари экилди.

Энг қувонарлиси, сумалак сайли шунчаки кўнгилхушлик учун қилинмади. Ушбу муассаса ҳовлисида «Яшил макон» умуммиллий лойиҳаси доирасида боғ ташкил этилиб, у ерга мингдан ортиқ, жумладан 500 туп арча, 50 та сосна, қайрағоч, гужум, бодом, ўрик, олма ва шафтоли дарахтлари экилди. Бу эса ҳар бир тадбирни инсонларга, табиатга, элу юртга фойдали этиб ташкил қилиш мумкин эканлигини англатади.

Сиз-чи, ўзингиз яшаётган масканга қандай фойда келтирдингиз азиз юртдошим?

Сожида АЛЛАЁРОВА,

Ўзбекистон Экологик партияси,

Қашқадарё вилоят кенгаши

матбуот котиби