Экологик ислоҳотлар такомиллашиб, атроф-муҳит ва ундаги ресурсларни муҳофаза қилишга бўлган саъй-ҳаракатлар мунтазам давом этмоқда. Аммо жонли табиатга тажовузкорона муносабат ҳам тўхтамаяпти.

Сурхондарё вилояти Экология ва иқлим ўзгариши бош бошқармаси томонидан навбатдаги тезкор рейд тадбири давомида Боботоғ давлат ўрмон хўжалиги ҳудудида фуқаро Т.И. ўзига тегишли ов қуроли билан Ўзбекистон Республикаси Қизил китобига киритилган бир бош Бухоро тоғ қўйини ноқонуний равишда овлагани маълум бўлди.

Натижада Ўзбекистон Республикаси «Ов қилиш ва ов хўжаликлари тўғрисида»ги ҳамда «Ҳайвонот дунёсини муҳофаза қилиш ва ундан фойдаланиш тўғрисида»ги қонунлар талаблари бузилган.

Ҳуқуқбузарлик оқибатида Вазирлар Маҳкамасининг 2023 йил 7 декабрдаги 649-сонли қарори иловасига кўра, ҳайвонот дунёсига 412 миллион сўм зарар етказилгани аниқланди.

Ҳозирда ҳолат юзасидан суриштирув ишлари олиб борилмоқда.