Осиё тараққиёт банкининг 14-16 сентябрь кунлари бўлиб ўтган минтақавий форуми доирасида иқлим ўзгаришига мослашувни инвес­тициявий режалаштириш, молиялаштиришни жалб қилиш ҳамда иқлим лойи­ҳаларини тайёрлаш масалалари муҳокама қилинди.

Экология ва иқлим ўзгариши миллий қўмитаси ҳузуридаги Иқлим ўзгариши миллий маркази вакиллари форумнинг мавзули сессияларида иштирок этиб, иқлим ўзгаришига мослашиш, иқлим хатарларини баҳолаш ва экологик бошқарувнинг рақамли воситаларини ривожлантириш борасидаги миллий тажрибани тақдим этди.

ОТБ ва халқаро ташкилотлар вакиллари билан ўтказилган икки томонлама учрашувларда атмосфера ҳавоси сифатини яхшилаш, чўлланиш ва ер деградациясига қарши курашиш, шунингдек, миллий иқлим маълумотлари тизимини ривожлантириш йўналишларида ҳамкорликни кенгайтириш бўйича келишувларга эришилди.

Хусусан, Ўзбекистон ОТБнинг атмосфера ҳавоси сифатини яхшилаш ва чўлланишга қарши курашишга қаратилган минтақавий техник кўмак лойиҳаларига жалб этилади. Шунингдек, сунъий йўлдош технологиялари ва сунъий интеллектдан фойдаланган ҳолда миллий иқлим маълумотлари платформасини ривожлантириш, шунингдек, Иқлим ва тоза ҳаво коалицияси (CCAC) доирасида углерод чиқиндиларини қисқартириш ва ҳаво сифатини яхшилаш бўйича Миллий стратегияни ишлаб чиқиш лойиҳасини амалга ошириш масалалари муҳокама қилинди.

Форумда янграган Ўзбекистон ташаббуслари мамлакатимизнинг халқаро ҳамкорлигини кенгайтириш, экологик ва иқлим муаммоларига қарши самарали курашиш учун техник ва молиявий кўмакни жалб этиш йўлида муҳим қадам бўлди.