Суғурта фирибгарлигидан эҳтиёт бўлинг

Ҳаёт турли тасодифларга тўла. Чунончи, бахтсиз ҳодисалар ҳам бундан мустасно эмас. Шундай кезда жабр кўрган шахс суғурта компаниясига мурожаат қилади. Компания эса ўша жабрланган инсонга етарли миқдорда товон пулини тўлаши керак.

— Агар йўлда автоҳалокат содир бўлса, у ҳолда жабрланган фуқаро суғурта хизматини уч кун, яъни 72 соат ичида ўша ҳодисадан хабардор этиши керак, — дейди «Ўзагросуғурта» акциядорлик жамияти бошқаруви Суғурта даъволари департаменти бош менежери Ҳошим ТИЛАВОВ. — Шу билан бирга, суғурта полиси ва бошқа тегишли ҳужжатларни тақдим этиши зарур. Яна бир гап. Бир ой давомида жамият томонидан 35 минг дона суғурта полиси сотишга муваффақ бўлинди.

— Агар суғурта пули тўланмайдиган бўлса, у ҳолда фуқаро бу ҳақда неча кун ичида огоҳлантирилиши керак?

— Агар шундай ҳол рўй берса, фуқаро бу ҳақда 15 иш куни ичида хабардор этилади. Бу муддатни кечиктиришга ҳеч кимнинг ҳақи йўқ.

— Тоғли ҳудудларда аҳолининг уй-жой, мол-мулки баҳорги сел ва тошқиндан зарар кўрса, фуқаро қанча товон пули олиши мумкин?

— Масалан, уй юз миллион сўмга баҳоланган бўлса, фуқаро бунинг учун ана шу кўрсатилган сумманинг бир фоизига суғурта полиси сотиб олган бўлиши керак. Ана шунда уй баҳосининг юз фоизи тўланади. Аммо фуқаро бу ҳақда суғурта ташкилотини 7 кун ичида хабардор этиши зарур.

— Мажбурий суғурта тўловлари қачон бекор қилинган?

— 1998 йилга қадар аҳолининг иморат ҳамда чорва моллари мажбурий тарзда суғурталанар эди. Ўша йилдан эътиборан, мажбурий суғурта бекор қилинди ва суғурталаш ихтёрий равишда амалга ошириладиган бўлди. Фақат йўл-транспорт ҳодисасида учинчи шахс жавобгарлиги мажбурий суғурталанади.

— Эшитишимизча, ҳомиладор аёлларга ҳам товон пули тўланар экан?

— Ҳомиладор аёл бунинг учун 20 минг сўм тўлаб, суғурта полиси харид қилиши зарур. Шундан кейин унга товон пули берилади. Ҳозирги кунда фақат 20  шартнома имзоланган, холос. Аслида бу миқдор ниҳоятда оз. Уни ошириш чоралари кўриляпти.

— Суғурта фирибгарлиги билан боғлиқ ҳолатлар ҳам учрайдими?

— Кам бўлса-да, учрайди. Масалан, ўтган йили Қорақалпоғистон Республикаси ҳамда Самарқанд вилоятида шундай ҳолат кузатилди. Автомобилида ҳалокатга учраб, жабрланган ҳайдовчига зарар етказган шахс унга етарли миқдорда маблағ тўлаган. Аммо жабрланувчи бунга ҳам қаноат қилмасдан, суғурта компаниясидан ҳам пул талаб қилган.

Улуғбек ЖУМАЕВ

«Оила даврасида» мухбири