Юз терисининг саломатлигини мустаҳкамлаш борасида беш маслаҳат.

Биринчи маслаҳат

Егуликлар таркибидаги витамин ва минераллар иммунитетни кўтариш билан бирга, терининг кўринишини ҳам яхшилайди. Бироқ меъёрни аниқ олиш тавсия этилади. Акс ҳолда, аллергик реакциялар кузатилиши мумкин. Шунингдек, туз, ширинлик ва қовурилган маҳсулотлардан бироз тийилган маъқул. Эрта тонгда бир пиёла илиқ сув ичиш ёдингиздан чиқмасин. Яна кун давомида истеъмол қиладиган суюқликлар миқдори икки литрдан кам бўлмаслигига ҳам аҳамият бериш лозим.

Иккинчи маслаҳат

 Теримиз баҳорда ультрабинафша нурларига сезувчан бўлади. Узоқ муддат кўклам қуёшида юриш, тери куйиши, сувсизланиши, ажин тушиши каби салбий оқибатларни келтириб чиқариши мумкин. Шу боис қуёшдан ҳимояловчи махсус кремлардан фойдаланиш талаб этилади.

Учинчи маслаҳат

Юз терисини тозалаш йилнинг ҳар қайси фаслида ҳам парваришлашнинг муҳим босқичи саналади. Косметик пардоз воситаларини ишлатиш ёки ишлатмасликка қарамасдан, кунига икки маҳал юзни ювиш лозим. Оддий сувдан кўра, шифобахш ўтлар дамламаси ёки минерал сувда чайиш тавсия этилади. Шунингдек, юз таранглигини оширишга эрталаб юзни муз бўлакчалари билан уқалаш ҳам яхши ёрдам беради.

Тўртинчи маслаҳат

Юзни соғлом кўринишга келтириш учун уй шароитида ҳам табиий намлантирувчи воситалар тайёрлаш мумкин. Энг осон ва самаралиларидан бири: бир ош қошиқ қуритилган мойчечак гулини 200 миллилитр қайнаган сувга дамлаб, тиндирилади. Сўнг докадан ўтказиб, пахта ёрдамида юз артилади. Терини тинчлантириш ва юмшатиш хусусиятига эга мазкур ниқобдан ҳафтада 2-3 марта фойдаланиш мумкин.

Бешинчи маслаҳат

Баҳор қуёши юздаги сепкил ҳамда доғларни янада тўқроқ кўринишига сабаб бўлади. Айрим ҳолларда эса, улар катталашиши ёки кўпайиши ҳам мумкин. Бунинг олдини олувчи ниқобни тайёрлаш учун 100 грамм ерқалампир (хрен) илдизини иссиқ сувда ювиб, сўнг гўшт қиймалагичдан чиқарилади. Бир чой қошиқ ун билан аралаштириб, юпқа қилиб юзга сурилади. 15-20 дақиқадан сўнг илиқ сувда чайилади. Бу муолажани ҳафтасида икки марта уйқу олдидан такрорлаш лозим.