Яна нечта ГЭС қурилади?

— Бугунги давр ҳудудларда кичик гидроэлектростанциялар барпо этишни тақозо этмоқда, — дейди «Туронбанк» АТБ бошқаруви раиси ўринбосари Шоҳруҳ ­ШОАҲМЕДОВ. — Негаки, бу иш амалга оширилса, электр таъминоти яхшиланади. Шунинг учун Ўзбекистон ва Хитой ўртасида юртимизда кичик гидроэлектростанциялар қурилиши бўйича давлат келишувларини амалга ошириш мақсадида 2017-2018 йилларда «Туронбанк» АТБ ва Хитой экспорт-импорт банки ўртасида халқаро келишув имзоланди.

— Шартномага асосан, қанча миқдорда иш бажарилиши кўзда тутилган?

— «Ўзбекгидроэнерго» акциядорлик жамияти Хитойдан кичик ҳажмдаги гидроэлектростанцияларни келтириб, жойларда қуришни мўлжаллаб турибди. Мазкур ускуналар учун 144,3 миллион АҚШ доллари миқдорида маблағ ажратилади. У йигирма йил муддатга берилади. Шундай қилиб, бешта янги кичик ГЭСлар барпо этилади, мавжудлари таъмирланади. Шу кунга қадар яна бошқа 137 та лойиҳа амалга оширилиб, минглаб янги иш ўринлари яратилди.

— Микрокредит олган мижозга 26 дан 36 фоизгача миқдорда тўлов белгиланган. Бу кўп эмасми?

—  Хорижда бу миқдор 80-90 фоизни ташкил этади. Шунинг учун кўп жиҳатлар инобатга олиниб, шундай қарорга келинган. Қолаверса, кредити мавжуд бўлган шахс ҳам микрокредит олиши мумкин. Фуқароларга қулай бўлиши учун 5920 та банкомат ўрнатилди, йил сўнгига қадар яна 10 та мини банк очиш кўзда тутилган. Бу пулни нақдлаштиришдаги ноқулайликларга барҳам беради.

— Ернинг шўрини ювиш мақсадида ташкил этилган давсувмахсуспудрат корхоналари учун ажратилаётган кредитлар етарлими?

— Албатта. Ҳукумат қарори билан 2008 йилда ҳудудларда мелиорация юмушлари билан шуғулланадиган шундай давлат унитар корхоналари ташкил этилган эди. Ўтган вақт давомида 2 миллион гектардан ошиқ суғориладиган ерларнинг мелиоратив ҳолати яхшиланди. Бу ишларни муваффақиятли уддалашда молия муассасамизнинг ҳам муносиб улуши бор.

— «Turon-mobile» тизими ҳақида гапирсангиз?

— Мазкур тизим қатор қулайликларга эгалиги билан мижозларга маъқул бўлмоқда. У орқали онлайн тарзда жисмоний шахсларнинг миллий валютадаги карталаридан пул маблағларини муддатли омонатларга ўтказиш, онлайн тарзда конверсия амалиётларини амалга ошириш каби хизматлар кўрсатилмоқда. Биргина жорий йилнинг 1 июль ҳолатига кўра мобиль илова орқали банк мижозлари томонидан 312,5 минг АҚШ доллари сотилди ва салкам 122 миллион сўм пул маблағлари миллий валютадаги омонатларга жойлаштирилди.

Улуғбек ЖУМАЕВ,

«Оила даврасида» мухбири